ខេត្តត្បូងឃ្មុំ៖ ជនសង្ស័យ២នាក់ប្តីប្រពន្ធដែលជាប់ពាក់ព័ន្ធករណីគ្រឿងញៀន ត្រូវបានកម្លាំងជំនាញនៃអធិការដ្ឋាននគរបាលស្រុកមេមត់ចាប់ឃាត់ខ្លួនភ្លាមៗ គ្រាដែលក្រុមជនសង្ស័យបានធ្វើសកម្មភាពដោះដូរគ្រឿងញៀននៅក្នុងមូលដ្ឋានរបស់ខ្លួន កាលពីវេលាម៉ោង២ និង១០នាទីរសៀលថ្ងៃទី៧ មិថុនា ២០១៦ ស្ថិតនៅក្នុងភូមិសំបូរ ឃុំមេមង ស្រុកមេមត់ ខេត្តត្បូងឃ្មុំ ។

សមត្ថកិច្ចនគរបាលបានឲ្យដឹងថា បន្ទាប់ពីបានធ្វើការស្រាវជ្រាវលើករណីរក្សាទុកជួញដូរដោយខុសច្បាប់នូវសារធាតុញៀន រហូតឈានដល់ចាប់ឃាត់ខ្លួនជនសង្ស័យបាន២នាក់ ដែលមានឈ្មោះមៀច ហុង ភេទប្រុស អាយុ៤២ឆ្នាំ និងប្រពន្ធឈ្មោះអឿន ភីណា អាយុ៤៣ឆ្នាំ ទាំង២នាក់ប្តីប្រពន្ធរស់នៅក្នុងភូមិកើតហេតុខាងលើ ។

ក្នុងប្រតិបត្តិការណ៍នេះដែរសមត្ថកិច្ចបានធ្វើការឆែកឆេរ នៅក្នុងលំនៅឋានរបស់ជនសង្ស័យបានរកឃើញម្សៅក្រាមពណ៌ស ដែលសង្ស័យថាជាថ្នាំញៀនទាំងមុននិងក្រោយចំនួន៤៨កញ្ចប់ រថយន្តCamryផលិតឆ្នាំ១៩៨៩១គ្រឿង និងសម្ភារប្រើប្រាស់ វេចខ្ចប់គ្រឿងញៀនមួយចំនួនទៀត ។

បច្ចុប្បន្នជនសង្ស័យទាំង២នាក់ប្តីប្រពន្ធ រួមជាមួយវត្ថុតាងថ្នាំញៀន ត្រូវបានកម្លាំងជំនាញនៃអធិការដ្ឋាននគរបាលស្រុកមេមត់ ដើម្បីកសាងសំណុំរឿងតាមនីតិវិធីច្បាប់ដើម្បីបញ្ជូនទៅសាលាដំបូងខេត្តត្បូងឃ្មុំ ៕

ដោយ៖ វណ្ណះ