រាជធានីភ្នំពេញ ៖ បុរសម្នាក់ជាអ្នករត់ម៉ូតូឌុប ទើបតែមកពីផឹកស៊ីស្រវឹងហើយជេរដៀមដាម និងស្តោះទឹកមាត់ដាក់មុខទៀត បុរសម្នាក់ទៀតជាអ្នករត់ម៉ូតូឌុបដូចគ្នាដោយទប់កំហឹងជាយូរណាស់មកហើយនោះបានវាយមួយដៃបែកក្តោងច្រមុះហូរឈាមស្រោចខ្លួន ។
ហេតុការណ៍នេះ ធ្វើឱ្យភ្ញាក់ផ្អើលកាលពីវេលាម៉ោង៤ និង៤០នាទីរសៀលថ្ងៃទី២៧ កក្កដា ២០១៥ ស្ថិតនៅខាងមុខភោជនីយដ្ឋានទន្លេបាសាក់២ តាមបណ្ដោយផ្លូវព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន ។
បើតាមប្រភពពត័មានពី បុរសរងគ្រោះមានឈ្មោះសុខ ពន្លក អាយុ៤០ឆ្នាំ ជាអ្នករត់ម៉ូតូឌុប ស្នាក់នៅផ្ទះជួលម្តុំចោមចៅ ។ ចំណែកបុរសដៃដល់ឈ្មោះផៃ គឹមហួន អាយុ៣៣ឆ្នាំ ជាអ្នក់ម៉ូតូឌុបដូចគ្នា ។
ប្រភពបន្តបានឱ្យដឹងថាមុនពេលកើតហេតុ គេឃើញបុរសជនដៃដល់ឈរនៅចាំដឹកម៉ូយនៅកន្លែងកើតហេតុខាងលើ ក៏ស្រាប់តែលេចមុខបុរសរងគ្រោះ បានជិះម៉ូតូមកដល់ ។ ហើយបានឈប់ម៉ូតូរួចហើយ ក៏បានដើរសំដៅ និងធ្វើការស្រែកជេរដៀមដាមដាក់ មិនតែប៉ុណ្ណោះ ថែមទាំងស្តោះទឹកមាត់ដាក់មុខបុរសរូបនោះទៀត ដោយទប់កំហឹងមិនបានរូបគេ ក៏បានស្ទុះទៅវាយមួយដៃចំកណ្តាលមុខបណ្តាលឱ្យបែកក្តោងច្រមុះហូរឈាមស្រោចខ្លួនតែម្តង ។
ក្រោយកើតហេតុបុរសទាំង២នាក់ត្រូវបានសមត្ថកិច្ចប៉ុស្តិ៍ទន្លេបាសាកធ្វើការឃាត់ខ្លួនបញ្ចូនទៅអធិការដ្នាននគរបាលខណ្ឌចំការមនដើម្បីរងចាំការដោះស្រាយ៕
