អ៊ីរ៉ងជាប្រទេសមានទីផ្សាខ្ពស់បំផុតនៅក្នុងតំបន់មជ្ឈឹមបូព៌ា និងជាទីចាប់អារម្ភពីសំណាក់ក្រុមវិនិយោគជាច្រើនមកពីជុំវិញពិភពលោក។ ប៉ុន្តែក្រុមវិនិយោគបានខ្លាចរអាពីអសន្តិសុខនយោបាយទើបមិនសូវហានវិនិយោគនៅទីនោះ។
នៅពេលដ៏ខ្លីខាងមុខក្រោយការអំពានាវរបស់ប្រទេសមហាអំណាច អាមេរិក អង់គ្លេស បារាំង និងអាល្លឺម៉ង់ បានធ្វើសេចក្តីថ្លែងការណ៍រួមគ្នាមួយ ដែលនៅក្នុងនោះគេបានជំរុញឲ្យធនាគារ និងក្រុមហ៊ុនមិនថា ជាតិនិងអន្តរជាតិផ្តើមធ្វើជំនួញជាមួយអ៊ីរ៉ង់។ ការលើកទឹកចិត្តឲ្យមានទំនាក់ទំនងពាណិជ្ជកម្មឡើងវិញជាមួយអ៊ីរ៉ង់គឺផ្នែកមួយនៃការសន្យាដកទណ្ឌកម្មដែលលោកខាងលិចបានសន្យាជាថ្នូរនឹងកែប្រែកម្មវិធីនុយក្លេអ៊ែររបស់អ៊ីរ៉ង់។
សេចក្តីថ្លែងការណ៍រួមប្រទេសលោកខាងលិច អាមេរិក បារាំង អង់គ្លេស និងអាល្លឺម៉ង់ បានបញ្ជាក់ថា គេនឹងមិនដាក់ជើងរាទឹកបិទខ្ទប់មិនឲ្យមានសកម្មភាពពាណិជ្ជកម្មជាមួយអ៊ីរ៉ង់នោះទេ។ រាល់ក្រុមហ៊ុនអន្តរជាតិ ឬស្ថាប័នហិរញ្ញវត្ថុមានសេរីភាពទៅធ្វើជំនួញនៅអ៊ីរ៉ង់ បើសិនជំនួញនោះស្របតាមច្បាប់ដែលបានចែង។ សេចក្តីថ្លែងការណ៍រួមរបស់ប្រទេសមហាអំណាចធ្វើឡើងក្រោយកិច្ចប្រជុំនៅទីក្រុងព្រុចស៊ែលមានន័យស្មើនឹងការបើកភ្លើងខៀវអនុញ្ញាតឲ្យក្រុមហ៊ុន និងស្ថាប័នធានាគារបរទេស ចូលទៅធ្វើជំនួញនៅទឹកដីអ៊ីរ៉ង់។ តាមរយៈសេចក្តីថ្លែងការណ៍រួមប្រទេសលោកខាងលិច ជាពិសេសអាមេរិកចង់និយាយធានាទៅក្រុមហ៊ុនបរទេស ជាពិសេសក្រុមហ៊ុនអឺរ៉ុប ដែលរហូតមកនៅរារែក មិនទាន់ហ៊ានត្រលប់ទៅបោះទុនវិនិយោគនៅអ៊ីរ៉ង់ ដោយសារខ្លាចការដាក់ទណ្ឌកម្មរបស់អាមេរិក។
សូមបញ្ជាក់ថា ធនាគារអឺរ៉ុបភាគច្រើនដែលមានសាខារបស់ខ្លួនក្នុងទឹកដីអាមេរិក នៅតែមិនទាន់ទុកចិត្ត ត្រលប់ទៅធ្វើជំនួញជាមួយអ៊ីរ៉ង់ដោយខ្លាចក្រែងការប្តឹងផ្តល់ពិន័យពីតុលាការអាមេរិក។ អាមេរិកដែលដឹកនាំការចរចា ៥ភាគីបូក១ រហូតបានសម្រេចកិច្ចព្រមព្រៀងជាប្រវត្តិសាស្រ្តស្តីពីនុយក្លេអ៊ែរអ៊ីរ៉ង់ នៅតែរក្សាទណ្ឌកម្មសេដ្ឋកិច្ចមួយចំនួន ទៅលើអ៊ីរ៉ង់ ដោយសារតែកម្មវិធីផលិតមីស៊ីលអន្តរទ្វីប ហើយនិងការចូលរួមផ្នែកយោធារបស់អ៊ីរ៉ង់ទៅក្នុងជម្លោះប្រដាប់អាវុធនៅដើមបូព៌ា។
លោក ម៉ូហាម៉ាដ ហ្សាវ៉ាហ្សារីហ្វ រដ្ឋមន្រ្តីការបរទេសអ៊ីរ៉ង់ បានស្វាគមសេចក្តីថ្លែងការណ៍របស់របស់ប្រទេសលោកខាងលិច ដែលតាមពិតទៅអាចជាលទ្ធផលនៃការទាមទាររបស់ភាគីអ៊ីរ៉ង់កន្លងមក។ កាលពីខែមេសាកន្លងទៅប្រមុខការបរទេសអ៊ីរ៉ង់ធ្លាប់បានទាមទារឲ្យសមភាគីអាមេរិកយល់ព្រមដកជាស្ថាពរទណ្ឌកម្មសេដ្ឋកិច្ចទៅតាមកិច្ចព្រមព្រៀងដែលបានចូលជាធរមានកាលពីខែមករាដើមឆ្នាំនេះ។ អ៊ីរ៉ង់ទាមទារដូច្នេះ ព្រោះថាក្រុមហ៊ុន និងធនាគារអឺរ៉ុប អាស៊ី អាមេរិក ជាច្រើននៅតែអរិភាពមិនទាន់ចង់ទៅធ្វើជំនួញនៅអ៊ីរ៉ង់៕
ប្រែសម្រួល៖ សាធី
