អាហ្សង់ទីន ឈីលី ប៉ារ៉ាហ្គាយ និងអ៊ុយរ៉ាហ្គាយ បានដាក់ដេញថ្លៃរួមគ្នាជាផ្លូវការក្នុងការធ្វើជាម្ចាស់ផ្ទះការប្រកួតបាល់ទាត់ពិភពលោកឆ្នាំ២០៣០ ពោលគឺ១០០ឆ្នាំបន្ទាប់ពីការប្រកួតបើកសម្ពោធត្រូវបានធ្វើឡើងនៅទីក្រុង Montevideo។
ប្រជាជាតិប្រទេស អាមេរិក ខាង ត្បូង ទាំង៤ បាន អំពាវនាវ ឱ្យ ព្រឹត្តិការណ៍ World Cup ត្រឡប់ ទៅកន្លែង ដែល បាល់ទាត់បាន កើត។ ពួកគេនឹងប្រកួតប្រជែងជាមួយនឹងការដេញថ្លៃរួមគ្នាពីប្រទេសអេស្ប៉ាញ និងព័រទុយហ្គាល់ និងការដេញថ្លៃដែលអាចធ្វើទៅបានពីប្រទេសម៉ារ៉ុក និងអារ៉ាប៊ីសាអ៊ូឌីត។
លោក Alejandro Dominguez ប្រធានសហព័ន្ធបាល់ទាត់អាមេរិកខាងត្បូង (Conmebol) បាននិយាយថា “ការប្រកួតបាល់ទាត់ពិភពលោកឆ្នាំ២០៣០ មិនមែនគ្រាន់តែជាការប្រកួតបាល់ទាត់ពិភពលោកមួយផ្សេងទៀតនោះទេ វាសមនឹងទទួលបានការអបអរសាទរជាមួយការទទួលស្គាល់រយៈពេល១០០ឆ្នាំ” ។
លោកបានបន្ថែមថា “យើងជឿជាក់ថា FIFA មានកាតព្វកិច្ចគោរពដល់ការចងចាំរបស់អ្នកដែលបានមកមុនយើង ហើយជឿជាក់លើភាពអស្ចារ្យ និងបានបង្កើតការប្រកួតបាល់ទាត់ពិភពលោកជាលើកដំបូង” ។
ម្ចាស់ជើងឯក២សម័យកាល អ៊ុយរ៉ាហ្គាយ បានឈ្នះការប្រកួត World Cup ជាលើកដំបូងក្នុងនាមជាម្ចាស់ផ្ទះ នៅពេលដែលត្រូវបានប្រារព្ធឡើងនៅរដ្ឋធានី Montevideo របស់ប្រទេសនេះកាលពីឆ្នាំ១៩៣០។ អាហ្សង់ទីនដែលជាម្ចាស់ផ្ទះឆ្នាំ១៩៧៨ បានគ្រងតំណែងជើងឯកពិភពលោកជាលើកទី៣នៅកាតាក្នុងឆ្នាំ២០២២កន្លងទៅ ខណៈដែលប្រទេសឈីលីក៏ធ្លាប់ធ្វើជាម្ចាស់ផ្ទះម្តងដែរកាលពីឆ្នាំ១៩៦២។
ប្រធានសមាគមបាល់ទាត់អាហ្សង់ទីន (AFA) លោក Claudio Tapia បាននិយាយថា “ក្នុងនាមជាម្ចាស់ជើងឯកពិភពលោក យើងអនុវត្តការដេញថ្លៃនេះ ដែលជាក្តីសុបិនរបស់ប្រជាជនអាមេរិកខាងត្បូងទាំងអស់ មិនត្រឹមតែនៅលើគម្រប់ខួបមួយសតវត្សនៃការធ្វើម្ចាស់ផ្ទះលើកទី១ប៉ុណ្ណោះទេ ប៉ុន្តែដោយសារតែចំណង់ចំណូលចិត្តដែលយើងរស់នៅជាមួយបាល់ទាត់” ។
ប្រធានាធិបតីអាហ្សង់ទីន Alberto Fernandez ក៏បាននិយាយនៅលើ Twitter ថា “ប្រទេសជិតខាង Bolivia នឹងត្រូវបានស្នើសុំឱ្យចូលរួមសុបិននេះផងដែរ” ។
គួរបញ្ជាក់ថា ព្រឹត្តិការណ៍បាល់ទាត់ពិភពលោក (World Cup) ឆ្នាំ២០២៦ខាងមុខ គឺធ្វើឡើងនៅសហរដ្ឋអាមេរិក កាណាដា និងម៉ិកស៊ិកដែលជាម្ចាស់ផ្ទះរួមគ្នា ៕ (រូបភាព ៖ BBC Sport )
