ក្នុងពេលដែលអ្នកឯកទេសរបស់ចិនគាំទ្រនូវគោលនយោបាយការបរទេសដែលមានការយោគយល់ក៏មានអ្នកឯកទេសជាច្រើនទៀតរួមទាំងមន្ដ្រីយោធាជាន់ខ្ពស់របស់ចិនមួយចំនួនក៏បានបញ្ជាក់ថា អាមេរិកកំពុងព្យាយាមហ៊ុមព័ទ្ធប្រទេសចិនតាមរយៈការបង្កើនចំណងមិត្ដភាពជាមួយប្រទេសជិតខាងដូចជាអាហ្វហ្កានីស្ថាន និងឥណ្ឌាជាដើម។
បន្ទាប់ពីសន្និបាតអាស៊ាន បណ្ដាប្រទេសមួយចំនួននៅអាស៊ីភាគអាគ្នេយ៍បង្ហាញការព្រួយបារម្ភយ៉ាងខ្លាំងពីឥទ្ធិពលរបស់ចិនកាន់តែខ្លាំងឡើងៗ បានជំរុញអាមេរិកត្រូវដើរតួនាទីឲ្យបានច្រើនជាងនេះនៅក្នុងតំបន់អាស៊ាន ពិសេសជួយដោះស្រាយវិវាទនៅលើដែនសមុទ្រដែលចិនកំពុងតែប្រកាសសិទ្ធិគ្រប់គ្រងនោះ។ ពេលរដ្ឋមន្ដ្រីការបរទេសអាមេរិក បានគាំទ្រនូវសំណើរបស់បណ្ដាប្រទេសអាស៊ីភាគអាគ្នេយ៍ ដោយបានប្រកាសថា សេរីភាពដែនសមុទ្រខាងត្បូងស្ថិតនៅក្នុងផលប្រយោជន៍របស់អាមេរិក។ ក្រោយការប្រកាសនោះ រដ្ឋមន្ដ្រីក្រសួងការបរទេសចិនក៏ក្រោកឡើងដើរចេញទៅក្រៅបង្ហាញការខឹងសម្បាយ៉ាងខ្លាំងដល់អាមេរិក។ មួយម៉ោងក្រោយមកក៏ត្រឡប់ចូលកិច្ចប្រជុំវិញដោយលោកបានប្រកាសថា ចិនគឺជាប្រទេសធំ ប្រទេសដទៃទៀតជាប្រទេសតូច ទាំងនោះជាការពិត។ ចំណុចទាំងអស់នោះហាក់បីដូចជាសំដៅទៅលើប្រទេសសិង្ហបុរី និងប្រទេសជាច្រើនទៀតក្នុងតំបន់អាស៊ាន ដែលជាសម្ពន្ធមិត្ដដ៏ជិតស្និទ្ធរបស់អាមេរិក។
ប្រតិកម្មរបស់លោក Yang Jiechi ជាចំណុចខុសប្លែកនៅក្នុងកិច្ចប្រជុំអាស៊ាន ហើយក៏មិនដូចជាឥរិយាបថរបស់លោកដែលជាមនុស្សចេះគួរសម និងដោះស្រាយបញ្ហាយ៉ាងប៉ិនប្រសប់ និងជាអ្នកដើរតាមគោលនយោបាយផ្សះផ្សានោះ។ ប្រតិកម្មរបស់លោកមិនខុសអ្វីពីគោលនយោបាយរដ្ឋាភិបាលចិននាពេលបច្ចុប្បន្នឡើយ។ ទិដ្ឋភាពទំនាក់ទំនងការបរទេសរបស់ចិនក្នុងពេលដែលប្រធានាធិបតីចិនបំពេញទស្សនកិច្ចទៅកាន់អាមេរិក មេដឹកនាំទាំងពីរបានពិភាក្សាក្នុងលក្ខណៈផ្សះផ្សាពីអធិបតេយ្យភាព គឺផ្ទុយទាំងស្រុងទៅលើការពិតថាចិនក្នុងរយៈពេល២ឆ្នាំចុងក្រោយនេះឌឺដងដល់ប្រទេសជិតខាងរបស់ខ្លួនទាំងអាមេរិកផងដែរ។
មន្ដ្រីជាន់ខ្ពស់នៅតំបន់អាស៊ីភាគអាគ្នេយ៍បានឲ្យដឹងថា ថ្ងៃនេះយើងបានមើលឃើញចិនមានការខុសប្លែកជាងកាលពី១០ឆ្នាំមុន ដែលគោលនយោបាយរបស់ចិនធ្លាប់ទន់ភ្លន់ជាមួយបណ្ដាប្រទេសជិតខាងតែថ្ងៃនេះខុសស្រឡះ។ ក្នុងរយៈពេលមួយទសវត្សកន្លងមក រដ្ឋាភិបាលទីក្រុងប៉េកាំងបានផ្លាស់ប្ដូរយ៉ាងធំធេងផ្ទៃក្នុងរបស់ខ្លួន ហើយការផ្លាស់ប្ដូរទាំងនោះបានធ្វើឲ្យប្រែប្រួលនូវឥរិយាបថរបស់ចិនក្នុងទំនាក់ទំនងជាមួយបណ្ដាប្រទេសនៅលើពិភពលោក៕
ប្រែសម្រួល៖ សាធី
