ភ្នំពេញ៖ រថយន្តសេរីទំនើបម៉ាកRANGE ROVERមួយគ្រឿង ដោយម្ចាស់ទំនងជាស្រវឹងស្រា បានបើកនិងរេចង្កូតទៅបុក រនាំងដែកពុះចែកទ្រូងផ្លូវ បណ្ដាលឲ្យវៀចនិងបាក់ខ្ទេច អស់ចំនួន១៦ផ្ទាំង តែសំណាងល្អមិនបណ្ដាលឲ្យមានគ្រោះថ្នាក់ដល់អ្នកដំណើរតាមផ្លូវ។
ហេតុការណ៍នេះបានកើតឡើងនៅវេលា ម៉ោង១១និង៥៥នាទីយប់ ថ្ងៃទី១០ ខែមិថុនា ឆ្នាំ២០១៦ នៅចំណុចទុលមុខ គ្រឹះស្ថានមេក្រូហិរញ្ញវត្ថុ វិនស៊ិនហ្វាន់ តាមបណ្ដោយផ្លូវផ្លូវព្រះមុនីវង្ស ស្ថិតក្នុងសង្កាត់បឹងកេងកង១ ខណ្ឌចំការមន ។
តាមប្រភពព័ត៌មានពីកន្លែងកើតហេតុបានឲ្យដឹងថា គឺមានប្រជាពលរដ្ឋបាន ឃើញរថយន្តបង្កម៉ាក RANGE ROVER ពណ៌ខ្មៅ ពាក់ស្លាកលេខ ភ្នំពេញ 1AA .8777 ធ្វើដំណើរតាមផ្លូវព្រះ មុនីវង្ស ទិសដៅ ពីត្បូងទៅជើង លុះដល់ស្តុប ៣១០កែងផ្លូវព្រះមុនីវង្ស រថយន្តបានបួងចង្កូត បត់ឆ្វេងត្រលប់ក្រោយ វិញ តាមផ្លូវព្រះមុនីវង្សដដែល តែទិសដៅ ជើងទៅត្បូងវិញ ដោយក្នុងល្បឿនយ៉ាងលឿនហើយក៏ជ្រុលទៅបុកនិងរនាំងដែកពុះចែកទ្រូងផ្លូវ បណ្ដាលឲ្យវៀចនិងបាក់ខ្ទេច អស់ចំនួន១៦ផ្ទាំង ចំណែករថយន្តបង្កខ្ទេចផ្នែកខាងមុខទាំងស្រ៊ុង។ ភ្លាមៗនោះដែរ អ្នកបើករថយន្តបង្ក បានបន្ថែមល្បឿនបើករត់គេច រហូតដល់ ទុលមុខផ្ទះលេខ៤៥ផ្លូវ៥៧ ស្ថិតក្នុងសង្កាត់បឹងកេងកង១ ខណ្ឌចំការមន បានទុករថយន្តចោល ហើយអ្នកបើកបរបានរត់គេចខ្លួនបាត់ ។
ក្រោយពេលកើតហេតុ រថយន្តបង្ករ ត្រូវបានសមត្ថកិច្ចជំនាញធ្វើការវាស់វែងនិង ស្ទួចយកទៅរក្សាទុកនៅ ការិយាល័យចរាចរណ៍ផ្លូវគោករាជធានីភ្នំពេញ ដើម្បីធ្វើការដោះស្រាយ តាមផ្លូវច្បាប់៕
ដោយ៖ ជីម ភារ៉ា ដង្កោ
