តំណាងអង្គការសហប្រជាជាតិបានប្រកាសឲ្យដឹងថា ដើម្បីជួយដល់ជនភៀខ្លួនដែលកំពុងតែជាប់គាំនៅប្រទេសក្រិចនិងតំបន់បាលកានគឺត្រូវការទឹកប្រាក់ប្រមាណ ៦៧០លានដុល្លារអាមេរិក។
ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនបានឲ្យដឹងថា អង្គការនេះត្រូវការទឹកប្រាក់ ៦៧០លានដុល្លារនៅក្នុងឆ្នាំ២០១៦ ជួយដល់ជនភៀសខ្លួនកំពុងតែជាប់គាំនៅក្រិច។ លោក Stephane Dujarric តំណាងអង្គការស្តីពីជនភៀខ្លួនបានឲ្យដឹងថា មកទល់ពេលនេះអង្គការរបស់លោកទទួលបានប្រាក់ ៣២៩លានដុល្លារពីក្រុមផ្តល់ជំនួយមនុស្សធម៌។
លោក Stephane Dujarric បន្តទៀតថា ជនភៀសខ្លួនជាច្រើនកំពុងត្រូវការផ្តល់ជំនួយពិសេសគឺកុមារ ស្ត្រីនិងមនុស្សចាស់ ពិសេសអ្នករងរបួស។ ចំនួនកុមារភាសខ្លួនបានកើនឡើង ៣៨ភាគរយ ។
បើទោះបីអាកាសធាតុមិនអំណោយផលក៏ដោយក្នុងរយៈពេល៥ខែដំបូងឆ្នាំ២០១៦ មានជនភៀសខ្លួនប្រមាន ២សែននាក់ចូលអឺរ៉ុបតាមដែនសមុទ្រក្នុងនោះមាន ១៥ម៉ឺននាក់បានទៅកាន់ប្រទេសក្រិច។
រយពេលកន្លងមកទូកដឹកជនភៀសខ្លួនបានលិចជាបន្តបន្ទាប់សម្លាប់មនុស្សជាច្រើននៅតាមដែនសមុទ្រ។ យោងតាមអង្គការអន្តោប្រវេសន៍អន្តរជាតិ MOI ទូកដឹកជនភៀសខ្លួនរាប់រយនាក់ដែលក្រឡាប់លិចនៅសមុទ្រមេឌីទែរ៉ាណេ ក្បែរកោះក្រិក នៅដើមខែមិថុនានេះ ជាទូកធ្វើដំណើរមកពីអាហ្វ្រិក ហើយដឹកជនភៀសខ្លួនយ៉ាងហោច ៧០០នាក់។ ក្រុមប៉ូលិសកំពង់ផែក្រិកមិនបានបញ្ជាក់តួលេខនេះទេ តែលើកឡើងថា នៅលើទូកមានមនុស្សរាប់រយនាក់។
កងល្បាតដែនសមុទ្រអ៊ីតាលីបានទទួលដំណឹងអាសន្នពីកប៉ាល់រកស៊ីមួយគ្រឿងកាលពីល្ងាចថ្ងៃព្រហស្បតិ៍ប្រាប់ថា មានកប៉ាល់ជនភៀសខ្លួនកំពុងជួបបញ្ហានៅតំបន់ចន្លោះដែនទឹកក្រិកនិងអេហ្ស៊ីប។ ប៉ូលិសកំពង់ផែប្រាប់ថា នឹងបញ្ជូនជនភៀសខ្លួន ដែលរួចផុតពីគ្រោះថ្នាក់ក្រឡាប់ទូកនេះបែងចែកចំនួនទៅអ៊ីតាលី និងអេហ្ស៊ីប ឲ្យស្របតាមច្បាប់សមុទ្រចែងពីការសង្គ្រោះ។
ប៉ូលិសក្រិកទើបតែបានចាប់ទូក១គ្រឿងដឹកជនភៀសខ្លួនស៊ីរី អាហ្វហ្កានីស្ថាន និងប៉ាគីស្ថាន កាលពីថ្ងៃ២៧ ខែឧសភា ប៉ុណ្ណោះ។ ការលិចទូកថ្ងៃសុក្រនេះ អាចបញ្ជាក់ថា ក្រុមជួញដូរជនភៀសខ្លួនប្រហែលជាចង់បើកបរទូកគេចពីកងកម្លាំងអង្គការអូតង់ ដែលឃ្លាំយាមនៅតំបន់ចន្លោះឆ្នេរតួកគីនិងឆ្នេរក្រិក។ គិតតាំងពីដើមឆ្នាំ២០១៦ មក ជនភៀសខ្លួនជិត ៤០០នាក់ក្នុងនោះមានកុមារច្រើនសន្ធឹកសន្ធាប់បានស្លាប់ក្នុងហេតុការណ៍លិចទូកផ្សេងៗ។
កាលពីថ្ងៃ២០ ខែមីនា កិច្ចព្រមព្រៀងរវាងសហភាពអឺរ៉ុបនិងតួកគីស្តីពីការប្រយុទ្ធប្រឆាំងការជួញដូរជនភៀសខ្លួន បានចូលជាធរមាន ។ កិច្ចព្រមព្រៀងចែងតំរូវឲ្យតួកគីពង្រឹងការប្រឆាំងការជួញដូរ ជនភៀសខ្លួនចាប់ពីឆ្នេរសមុទ្រតួកគីទៅ។ ជាការផ្តោះប្តូរសហភាពអឺរ៉ុបជួយគាំទ្រនយោបាយនិងហិរញ្ញវត្ថុឲ្យតួកគី។ តាំងពីកិច្ចព្រមព្រៀងចូលជាធរមាននិងមានការពង្រាយកងកម្លាំងល្បាតមកការឆ្លងទូកដឹកជនភៀសខ្លួនមកអឺរ៉ុបបានធ្លាក់ចុះជាងមុន៕
ប្រែសម្រួល៖ សាធី
