ភ្នំពេញ៖ បុរសម្នាក់ត្រូវបានអ្នកដំណើរតាមផ្លូវប្រទះឃើញដេកស្លាប់នៅកណ្តាលផ្លូវជាតិលេខ៣ រួមជាមួយម៉ូតូមួយគ្រឿងឆ្ងាយពីសាកសព៥០ម៉ែត្រ បុកជញ្ជាំងផ្ទះពលរដ្ឋ កាលពីវេលាម៉ោង២ និង៣០នាទីរំលងអាធ្រាត្រ ឈានចូលថ្ងៃទី១២ ខែមិថុនា ឆ្នាំ២០១៦ ត្រង់ចំណុចភូមិក្រាំងដូនទៃ សង្កាត់ចោមចៅ ខណ្ឌពោធិ៍សែនជ័យ ។

សពបន្ទាប់ពីប្រទះឃើញរួមជាមួយម៉ូតូមួយគ្រឿងបង្កភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះទៅពិនិត្យ ជំហានដំបូងពុំត្រូវបានស្គាល់អត្តសញ្ញាណឡើយ ក្នុងស្ថានភាព របួសរយៈ.កខាងស្តាំ និងបាក់កម៉ូតូបាក់កង់មុខ ។ ដោយអស់រយៈពេលជាច្រើនម៉ោងទើបរកអត្តសញ្ញាណឃើញ និងសាច់ញាតិ ។

ជនរងគ្រោះមានឈ្មោះ ប៊ិន រ៉ា ភេទប្រុស អាយុ២១ឆ្នាំ មុខរបរកម្មកររោងចក្រ មានទីលំនៅភូមិស្រែជម្រៅ សង្កាត់ចោមចៅ ខណ្ឌពោធិ៍សែនជ័យ ជិះម៉ូតូមួយគ្រឿងម៉ាក ហុងដាសេ១២៥ ស៊េរី២០០៨ ពណ៌ខ្មៅ ពាក់ស្លាកលេខ កណ្តាល 1F-0078 ជាមធ្យបាយ ។

តាមសាច់ញាតិ បានឲ្យដឹងថា នៅវេលាម៉ោង១១យប់ថ្ងៃទី១១ ខែមិថុនា ខណៈដែលជនរងគ្រោះកំពុងផឹកសុី ជួបជុំបងប្អូន នៅផ្ទះ ស្រាប់តែទទួលដំណឹងមួយថា មានបងប្រុសជួបគ្រោះថ្នាក់ចរាចរណ៍ បាក់ដៃជើង រួចជនរងគ្រោះគ្នា៣នាក់ជិះម៉ូតូ ទៅមើលបងប្រុសកំពុងដេកសម្រាកនៅមន្ទីរពេទ្យព្រះកុសុមះ រហូតដល់វេលាខាងលើ ជនរងគ្រោះបានជិះម៉ូតូវិលមកផ្ទះវិញ តែម្នាក់ឯង ទុកបងប្អូន២នាក់ នៅដេកកំដរបងប្រុស ។ ប្រភពបន្តទៀតថា ខណៈដែលជនរងគ្រោះជិះម៉ូតូមកផ្ទះដល់ចំណុចខាងលើ ក៏ជួបហេតុការណ៍នេះតែម្តង មិនដឹងថារងគ្រោះប៉ះជាមួយអ្វី នៅកន្លែងកើតហេតុ ពុំមានអ្នកឃើញហេតុការណ៍ឡើយ មានតែជនរងគ្រោះដេកស្លាប់ម្នាក់ឯង ។

តាមការសន្និដ្ឋានរបស់សមត្ថកិច្ចបានឲ្យដឹងថា ជនរងគ្រោះស្លាប់ដោយសារជួបគ្រោះថ្នាក់ចរាចរណ៍ តែភាគីបង្ករត់គេចទៅបាត់ ។ ក្រោយពីពិនិត្យ និងកោសល្យវិច័យរួច សាកសពប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី ដោយពុំបានប្តឹងផ្តល់អ្វីឡើយ ៕

ដោយ៖ សុខាសែនជ័យ