ខេត្តសៀមរាប៖ បន្ទាប់ពីបានអញ្ជើញចុះពិនិត្យស្ថានភាពទឹក ក៏ដូចជាការងារបង្កបង្កើនផលរបស់បងប្អូនប្រជាកសិករ នៅតាមបណ្តាខេត្តនានា ចាប់តាំងពីថ្ងៃទី ១១ ខែមិថុនា ឆ្នាំ ២០១៦ មក, នៅព្រឹកថ្ងៃ ១៣ ខែមិថុនា ឆ្នាំ ២០១៦ នេះលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានជួបប្រជុំជាមួយប្រធាន និងអនុប្រធានមន្ទីរធនធានទឹក និងឧតុនិយម ទាំង ២៥ រាជធានី ខេត្ត នៅខេត្តសៀមរាប ។
ថ្លែងនៅក្នុងជំនួបប្រជុំនោះលោករដ្ឋមន្ត្រី បានក្រើនរំលឹកដល់អស់លោកដែលជាថ្នាក់ដឹកនាំមន្ទីរទាំងអស់ បន្ថែមលើតួនាទី និងភារកិច្ច ដែលមានចែងក្នុងក្របខណ្ឌបទដ្ឋានគតិយុត្តិ ត្រូវយកចិត្តទុកដាក់ត្រៀមលក្ខណៈខ្ចប់ទឹកទុកសម្រាប់បម្រើឱ្យការងារបង្កបង្កើនផល ចុះជួយអន្តរាគមន៍បងប្អូនប្រជាពលរដ្ឋដែលរងផលប៉ះពាល់ដោយគ្រោះធម្មជាតិ តាមដានជាប់ជាប្រចាំនូវស្ថានភាពអាកាសធាតុ និងជូនដំណឹងឲ្យបានទាន់ពេលវេលា នូវរាល់បាតុភូតធម្មជាតិនានា ដែលកើតមានឡើង ជូនដល់សាធារណជន ពិសេសបងប្អូនប្រជានេសាទ និងអ្នកទេសចរ នៅតំបន់ឆ្នេរ និងកោះ ក្នុងលំហសមុទ្រ ៕
ដោយ៖ សុវណ្ណារ៉ា
