អ្នកជំនាញបរទេសបានឱ្យដឹងថា ទីផ្សារអចលនទ្រព្យវៀតណាមទំនងជាកើនឡើងយ៉ាងខ្លាំងនៅក្នុងរយៈពេល ១៥ឆ្នាំក្រោយ ប៉ុន្តែរដ្ឋាភិបាលគួរតែទប់ស្កាត់ហានិភ័យមួយចំនួន និងលើកកម្ពស់ធនធានមនុស្ស ព្រមទាំងហេដ្ឋារចនាសម្ព័ន្ធ ដើម្បីទាក់ទាញក្រុមហ៊ុនបរទេស ខណៈដែលប្រទេសនេះកំពុងតែធ្វើសមាហរណកម្មនោះ។
លោក Sigrid Zialcita នាយកគ្រប់គ្រងរបស់ក្រុមហ៊ុន Cushman & Wakefield បានមានប្រសាសន៍ថា ទីផ្សារអចលនទ្រព្យនៅអាស៊ី និងប៉ាស៊ីហ្វិកនឹងកើនឡើងយ៉ាងខ្ពស់ក្នុងអត្រា ៥.២ភាគរយក្នុងឆ្នាំនេះ។ វៀតណាម ហ្វីលីពីន និងឥណ្ឌូនេស៊ីនឹងឈានមុខគេនៅក្នុងចំណោមប្រទេសនៅតំបន់អាស៊ាន។
អ្នកវិនិយោគបរទេសកំពុងតែសម្លឹងមើលប្រកបដោយការចាប់អារម្មណ៍ទៅលើប្រទេសវៀតណាម ដោយសារតែការនាំចេញរបស់ក្រុមហ៊ុនបរទេសរបស់ពួកគេនៅទីនេះបានកើនឡើងគួរឱ្យកត់សម្គាល់ ហើយកំពុងតែសម្លឹងមើលកន្លែងដើម្បីជំនួសប្រទេសចិន និងសិង្ហបុរី កន្លែង ដែលមានថ្លៃដើមខ្ពស់។
ការធ្វើឱ្យប្រសើរឡើងនៃហេដ្ឋារចនាសម្ព័ន្ធនាពេលថ្មីៗនេះ បានធ្វើឱ្យវៀតណាមឈានដល់កម្រិតនៃការអភិវឌ្ឍមួយជំហានទៀត ប៉ុន្តែទោះបីជាយ៉ាងណាក៏ដោយ ប្រទេសនេះត្រូវតែធ្វើការឱ្យខ្លាំងដើម្បីប្រជែងជាមួយប្រទេសផ្សេងទៀត នៅពេលដែលកិច្ចព្រមព្រៀង FTAs និងកិច្ចព្រមព្រៀង TPP ចូលជាធរមាន។
នៅក្នុងវិស័យការិយាល័យនោះ ទីក្រុងហូជីមិញ និងហាណូយមានទំហំការិយាល័យមិនច្រើនជាងប្រទេសជិតខាងនោះទេ ហើយវៀតណាមត្រូវតែជំរុញការផ្គត់ផ្គង់បន្ថែមទៀត។
ទំហំដីប្រហែលជា ៥៤២,០០០ម៉ែត្រការ៉េ ដែលស្ថិតក្រោមការសាងសង់នោះ មិនអាចបំពេញតម្រូវការទ ហើយការវិនិយោគផ្នែកការិយាល័យគ្រោងនឹងកើនឡើងទ្វេដងត្រឹមឆ្នាំ២០២០។
បដិសណ្ឋារកិច្ចលើសណ្ឋាគារចាំបាច់ត្រូវការច្រើនជាង ១២០,០០០បន្ទប់ ត្រឹមឆ្នាំ២០៣០ ដើម្បីបំពេញតម្រូវការភ្ញៀវទេសចរ ។
យើងបានមើលឃើញពីការអភិវឌ្ឍយ៉ាងខ្លាំងតាមរយៈឧស្សាហកម្មរាយរងជាច្រើន ដែលផ្តល់ដោយក្រុមហ៊ុនបរទេស ដែលបានមកពីជប៉ុន និងថៃ ហើយប្រទេសនេះចាំបាច់ត្រូវការទំហំការិយាល័យប្រមាណជា ៤.៣លានម៉ែត្រការ៉េទៀតសម្រាប់វិស័យនេះត្រឹមឆ្នាំ២០៣០។
លោក Marc Townsend នាយកគ្រប់គ្រងក្រុមហ៊ុន CBRE វៀតណាមបានឱ្យដឹងថា រមណីយដ្ឋានជាច្រើនកំពុងតែត្រូវបានគេមើលឃើញពីការអភិវឌ្ឍយ៉ាងខ្លាំងនៅក្នុងតំបន់ Nha Trang តំបន់ Da Nang និងតំបន់ Phu Quoc។
លោកបានឲ្យដឹងទៀតថា តម្លៃដៃលបានកើនឡើងពី ៣០ ទៅ ៤០ភាគរយនាពេលបច្ចុប្បន្ននេះ ខណៈដែលតម្លៃអាផាតមិនមានស្ថិរភាពនៅឡើយទេ។
ទំហំនៃ ទីផ្សារអចលនទ្រព្យរបស់ប្រទេសនេះត្រូវបានកើនឡើងច្រើនដង ដោយសារតែការចូលមកនៃមូលធនអន្តរជាតិដ៏ធំ។ លោកបានបន្ថែមទៀតថា សួនឧស្សាហកម្មគឺជាកម្លាំងផ្សេងទៀតនៃទីផ្សារអចលនទ្រព្យវៀតណាមនេះ។
ទោះបីជាយ៉ាងណាក៏ដោយ លោកក៏បានរំលឹកផងដែរថា ទីក្រុងហូជីមិញ និងទីក្រុងហាណូយ អាចប្រឈមមុខនឹងការផ្គត់ផ្គង់លើស ដោយសារតែក្នុងរយៈពេល ២ឆ្នំាចុងក្រោយនេះមានការកសាងជាទ្រង់ទ្រាយធំ៕
ដោយ៖ រ័ត្ន
