ភ្នំពេញ៖ យុវជន២នាក់ត្រូវបានកម្លាំងនគរបាលប៉ុស្តិ៍ទួលសង្កែឃាត់ខ្លួនកសាងសំណុំរឿង​បញ្ជូនមកអធិការដ្ឋាននគរបាលខណ្ឌឫស្សីកែវដើម្បីចាត់ការបន្តទៅតាមនីតិវិធី ខណៈឆែកឆេរនៅក្នុងខ្លួន​របស់ជនសង្ស័យឃើញមានថ្នាំញៀន​ប្រភេទក្រាមពណ៌ស ។

ករណីខាងលើនេះបានធ្វើឡើងនៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី១៥ ខែមិថុនា ឆ្នាំ២០១៦ ស្ថិតនៅចំណុចផ្លូវលេខ៩០៧ ក្រុម១៥ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ ។

ជនសង្ស័យទី១-ឈ្មោះ ជុន សុខជាង ភេទប្រុស អាយុ២៣ឆ្នាំ មានស្រុកកំណើតភូមិ ឃុំបារាយណ៍ ស្រុកកងមាស ខេត្តកំពង់ចាម និងទី២-ឈ្មោះ ពើត សុខា ភេទប្រុស អាយុ២៩ឆ្នាំ មានស្រុកកំណើតភូមិកណ្តៀង ឃុំរោងដំរី ស្រុកបាភ្នំ ខេត្តព្រៃវែង ។

សមត្ថកិច្ចបានឲ្យដឹងថា មុនការឃាត់ខ្លួនជនខាងលើគឺកម្លាំងសមត្ថកិច្ចបានល្បាតនៅក្នុងមូលដ្ឋានហើយឃើញជនសង្ស័យជិះម៉ូតូ១គ្រឿងម៉ាកហុងដា សេ១២៥ ពាក់ស្លាកលេខ 1SP-3810 ចុះឡើងៗនៅក្នុងមូលដ្ឋានក៏មានការសង្ស័យរួចទៅឃាត់ដើម្បីត្រួតពិនិត្យឆែកឆេរឃើញថ្នាំញៀននាំខ្លួនមកទីស្នាក់ការប៉ុស្តិ៍តែម្តង ៕

ដោយ៖ អារុណរះ