ភ្នំពេញ៖ មនុស្ស២នាក់ ទទួលរងរបួសធ្ងន់ និងស្រាល ដោយករណីគ្រោះថ្នាក់ចរាចរណ៍ រថយន្តដឹកថ្មបើកបុកម៉ូតូរ៉ឺម៉កដឹកធ្យូង ជនរងគ្រោះទាំងពីរនាក់ ត្រូវបានរថយន្តសាមុយដឹកយកទៅ សង្គ្រោះបន្ទាន់នៅមន្ទីរពេទ្យជ័យជំនះ ក្រុងតាខ្មៅ។
ហេតុការណ៍គ្រោះថ្នាក់ចរាចរណ៍នេះកើតឡើង កាលពីវេលាម៉ោង ១០ និង២០នាទី ព្រឹកថ្ងៃទី២៨ ខែកក្កដា ឆ្នាំ២០១៥ នៅចំណុចលើកំណាត់ផ្លូវជាតិលេខ២ ភូមិក្រាំងស្វាយ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។ សមត្ថកិច្ចប្រាប់ថា ជនរងគ្រោះទាំង២នាក់ ទី១ឈ្មោះ សំ ភ័ណ្ឌ ភេទប្រុស អាយុ២៤ឆ្នាំ (រងរបួសធ្ងន់) និងទី២ឈ្មោះ យូ រ៉ាវង្ស ភេទប្រុស អាយុ២២ឆ្នាំ (រងរបួស្រាល) អ្នកទាំង២នាក់ រស់នៅភូមិកំពង់ថ្ម ឃុំឃ្លាំងចេក ស្រុកសំរោងទង ខេត្តកំពង់ស្ពឺ ។
សមត្ថកិច្ចប្រាប់បន្តទៀតឲ្យដឹងថា បន្ទាប់ពីវាស់វែងរួចរាល់ រថយន្តបង្កហេតុ និងរ៉ឺម៉កម៉ូតដឹកធ្យូងរបស់ជនរងគ្រោះ ត្រូវបាននាំទៅកាន់អធិការដ្ឋាននគរបាលខណ្ឌដង្កោ ដើម្បីរង់ចាំដោះស្រាយតាមច្បាប់ពេលក្រោយ ៕ ភារ៉ា ដង្កោ
