ខេត្តព្រះសីហនុ៖ បច្ចុប្បន្ននេះយេីងសង្កេតឃេីញថា មានជនខិលខូចមួយចំនួន តែងតែធ្វើសកម្មភាពលួចគប់បំបែកកញ្ចក់រថយន្តរបស់ប្រជាពលរដ្ឋតាមដងផ្លូវ ល្បីស្ទេីរគ្រប់ខេត្តទៅហើយ ប៉ុន្តែករណីទាំងនោះ ត្រូវបានកម្លាំងសមត្ថកិច្ចជំនាញ តាមបណ្ដាខេត្ត-ក្រុង រាជធានី ក៏មិនបណ្ដោយឱ្យក្រុមជនដៃដល់ទាំងនោះ គេចផុតពីសំណាញ់ ច្បាប់នោះឡេីយ។
ជាក់ស្ដែងកម្លាំងសមត្ថកិច្ចនគរបាលខេត្តព្រះសីហនុ បានស្រាវជ្រាវចុះបង្រ្កាប និងឃាត់ខ្លួនជនសង្ស័យចំនួន០២នាក់ ជិះម៉ូតូ១គ្រឿងឌុបគ្នា ប្រើដុំថ្មគប់ទៅគប់ប្រហារលើរថយន្ត ០១គ្រឿង ម៉ាក លិចសុីស RX330 ពណ៌ស ក្នុងទិសដៅផ្ទុយគ្នា បណ្តាលឱ្យបែកកញ្ចក់ខាងមុខផ្នែកខាងឆ្វេង។
យោងតាមរបាយការណ៍ របស់ស្នងការដ្ឋាននគរបាលខេត្តព្រះសីហនុ កាលពីថ្ងៃទី០១ ខែមេសា ឆ្នាំ២០២៣ វេលាម៉ោងប្រហែល ២២និង៣០នាទី នៅចំណុចផ្លូវចំណោទអូរត្រាវ ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ មានករណីគប់កញ្ចក់រថយន្ត មួយកើតឡើង បង្កដោយជនសង្ស័យចំនួន០២នាក់ មិនទាន់ស្គាល់អត្តសញ្ញាណ ជិះម៉ូតូ១គ្រឿង មកដល់ចំណុចខាងលើ បាន ប្រើដុំថ្មគប់ទៅលើរថយន្ត ០១គ្រឿង ម៉ាក លិចសុីស RX330 ពណ៌ស ក្នុងទិសដៅផ្ទុយគ្នា បណ្តាលអោយបែកកញ្ចក់ខាងមុខ ផ្នែកខាងឆ្វេង។ ក្រោយកើតហេតុ ជនរងគ្រោះ បានបន្តដំណើរទៅលំនៅដ្ឋាន នៅឯភូមិ៣ (ទំនប់រលក) សង្កាត់១ ក្រុងព្រះសីហនុ ដោយពុំបានប្ដឹងរាយការណ៍នោះទេ។
ពេលទៅដល់ផ្ទះគាត់ ទើបគាត់ទូរស័ព្ទប្រចាំបញ្ជារបស់អធិការដ្ឋាននគរបាលស្រុកព្រៃនប់ ដោយគាត់បានរៀបរាប់ប្រាប់ដល់សមត្ថកិច្ចយើងថា៖ ពេលគាត់មកដល់ចំណុចខាងលើ ក៏មានជនសង្ស័យ២នាក់ ជិះម៉ូតូ០១គ្រឿង បានធ្វើសកម្មភាពយកដុំថ្មគប់រថយន្តគាត់តែម្តង ក្រោយកើតហេតុ ជនបង្ករត់គេចខ្លួនបាត់។
ក្រោយទទួលបានព័ត៌មាននេះភ្លាម លោកស្នងការបានបញ្ជាអោយកម្លាំងអធិការដ្ឋាននគបាលស្រុកព្រៃនប់ ចុះមកសហការជាមួយកម្លាំងប៉ុស្តិ៍នគនរបាលរដ្ឋបាលឃុំបិតត្រាំង បានធ្វើការស្រាវជ្រាវស្វែងរក និងនាំខ្លួនជនសង្ស័យចំនួន២នាក់ មកសាកសួរនាំ នៅប៉ុស្តិ៍នគរបាលរដ្ឋបាលឃុំបិតត្រាំង តែជនទាំង២នាក់រឹងរូសមិនឆ្លើយសារភាព រហូតដល់ថ្ងៃទី២ ខែមេសា ឆ្នាំ២០២៣ វេលាម៉ោង ១និង៤៥នាទី ទើបបានបញ្ជូនជនសង្ស័យទាំង២ មកការិយាល័យនគរបាលព្រហ្មទណ្ឌកម្រិតធ្ងន់ ដើម្បីបន្តសាកសួរនីតិវិធី ជំនាញ ទើបជនសង្ស័យទាំង២នាក់ ព្រមសារភាពថា៖ ខ្លួនពិតជាបានធ្វើសកម្មភាព គប់ដុំថ្មទៅលើកញ្ចក់រថយន្តពិតប្រាកដមែន ។ មូលហេតុ ដោយខឹងរថយន្តជិះទិសដៅផ្ទុយគ្នាបើកភ្លើងហ្វាដាក់ចាំងភ្នែកខ្លួន មិនព្រមទម្លាក់ភ្លើងហ្វា ទើបខ្លួនខឹងក៏គ្រវែងដុំថ្មគប់ ប៉ុន្តែបែរជាត្រូវរថយន្តខាងក្រោយទិសដៅស្របគ្នាទៅវិញ បណ្តាលអោយបែកកញ្ចក់ខាងមុខ។
ជនសង្ស័យទាំង២នាក់បានឆ្លើយសារភាពថា៖ នៅថ្ងៃទី១ ខែមេសា ឆ្នាំ២០២៣ វេលេម៉ោងប្រហែល ២២និង០០នាទី ពួកគេទាំង២នាក់ បានជិះម៉ូតូចេញពីវត្តគិរីសុខារ៉ាម ស្ថិតនៅក្នុងភូមិពូធឿង ឃុំបិតត្រាំង ឆ្ពោះទៅក្រុងព្រះសីហនុ ដើម្បីតាមរកក្រុមស្ទាវ១ក្រុម ដែលបានចូលក្នុងវត្តរករឿងបង្កជម្លោះ ជាមួយរបស់ក្រុមខ្លួន។
ដោយជិះទៅបានប្រហែល ៤០០ម៉ែត្រ ពួកគេទាំង២នាក់បានឈប់ម៉ូតូបទជើងតូច និងបានរើសដុំថ្ម១ដុំ ដាក់នៅផ្នែកខាងមុខ គៀបប្រឡោះភ្លៅ ( អ្នកបើក ) រួចក៏បានបន្តដំណើរទៅមុខទៀតបានប្រហែល ១០០ម៉ែត្រ ក៏បានឃើញរថយន្តមួយគ្រឿង មានទិសដៅផ្ទុយគ្នា បានបើកភ្លើងហ្វា ធ្វើអោយពួកគេទាំង២នាក់ ពិបាកមើលផ្លូវ ពេលនោះឈ្មោះ ហេង ក៏បានបើកភ្លើងហ្វាម៉ូតូ ញាក់ចំនួន២ទៅ៣ដងដែរ ដើម្បីសុំអោយរថយន្តនោះទម្លាក់ភ្លើងហ្វា តែរថយន្តនោះមិនទម្លាក់អោយទេ ទើបឈ្មោះ ហេង បានយកដុំថ្មដែលរើសទុក ក្រវែងគប់ទៅលើរថយន្តនោះ តែម្ដងទៅ ប៉ុន្តែបែរជាត្រូវរថយន្តខាងក្រោយជិះទិសដៅស្របគ្នាទៅវិញ បន្ទាប់ពីធ្វើសម្មភាពរួចពួកគេទាំង២នាក់ ក៏បានជិះម៉ូតូរត់គេចខ្លួនទៅ តាមផ្លូវបត់ក្រុមហ៊ុន អាន កូ ចុះទៅខ្មែរធ្វើបាន រួចជិះទៅភូមិរបស់ខ្លួនវិញ ទើបសមត្ថកិច្ចឃាត់ខ្លួនបានតែម្ដង។
ជនរងគ្រោះមានឈ្មោះ ផែន ឆេងលី ភេទស្រី អាយុ ៤៤ឆ្នាំ ជនជាតិខ្មែរ ទីលំនៅភូមិ៣ (ទំនប់រលក) សង្កាត់១ ក្រុងព្រះសីហនុ ។ ជនសង្ស័យមានឈ្មោះ ១. ឈ្មោះ សោម សឿន ហៅនឿន ភេទប្រុស អាយុ១៩ ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ និង២. ឈ្មោះ គន ស៊ុនហេង ភេទប្រុស អាយុជនជាតិខ្មែរ មុខរបរមិនពិតប្រាកដ ( ជានាក់គប់កញ្ចក់រថយន្ត )ស្នាក់នៅភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ។
ចំណែកវត្ថុតាងដកហូតរួមមាន ៖ ម៉ូតូអាសង់សារីឆ្នាំ២០១៧ ពណ៌ខ្មៅ គ្មានស្លាកលេខ និងគ្មានការបាំងមុខ ចំនួន១ គ្រឿង, ទូរស័ព្ទចំនួន៣ គ្រឿង ម៉ាកVIVO ពណ៌ខ្មៅ ១គ្រឿង, ម៉ាកLG ពណ៌ទឹកប្រាក់ ១គ្រឿង, ម៉ាកOPPO, ដុំថ្ម១ដុំ។
បច្ចុប្បន្ននៅថ្ងៃទី០៣ ខែមេសា ឆ្នាំ២០២៣នេះ កម្លាំងការិយាល័យព្រហ្មទណ្ឌកម្រិតធ្ងន់ កំពុងបន្តនីតិវិធីជំនាញ ដេីម្បីកសាងសុំរឿងបញ្ជូនខ្លួនទៅកាន់សាលាដំបូងខេត្តចាត់ការតាមច្បាប់៕ដោយ៖សហការី
