ភ្នំពេញៈ មួយរយៈទៅនេះ និងក្នុងពេលបច្ចុប្បន្ន ប្រជាពលរដ្ឋជាអាជីវករ អ្នកលក់ដូរតាមលំនៅឋាន ផ្សារ ហាង និងកន្លែងប្តូរប្រាក់ជាដើម ពិតជាបានដឹង និងទទួលព័ត៌មានតៗគ្នាអំពីសកម្មភាពល្បិចលួចបន្លំ បោកប្រាក់បង្កឡើងដោយជនបរទេស ទាំងនៅរាជធានី-ខេត្ត ដោយពួកគេ មានបច្ចេកទេស មធ្យោបាយបោកយ៉ាងរហ័សរហូន បំផុត ។
កាលពីថ្ងៃទី៩ ខែកក្កដា ឆ្នាំ២០១៥ ជនជាតិបរទេស ប្រុស ស្រី២នាក់ ត្រូវបានសមត្ថកិច្ចនគរបាលក្រុងបានលុងចាប់ខ្លួនតាមការបញ្ជាដោយផ្ទាល់ពីលោក ថង សាវុន អភិបាល នៃគណៈអភិបាលខេត្តរតនគិរី សមត្ថកិច្ចបានបញ្ជូនខ្លួន រួមទាំងវត្ថុតាងប្រាក់៣.២០០ដុល្លារដែលជនបរទេសខាងលើនេះបន្លំបោកពីអាជីវករ ប៉ុន្តែជនសង្ស័យ ត្រូវបានខាងតុលាការដោះលែង បន្ទាប់ពីមន្ត្រីនគរបាលយុត្តិធម៌កសាងសំណុំរឿងបញ្ជូនទៅសាលាដំបូងតាមនីតិវិធី ។ ក្រោយមក នៅវេលាម៉ោង៥និង១០នាទីល្ងាច ថ្ងៃទី២៥ ខែកក្កដា ឆ្នាំ២០១៥ ជនបរទេសទាំងពីរនាក់នេះដដែលបានប្រព្រឹត្តបទល្មើសដដែល និងរាងចាល បោកប្រាស់ប្រជាពលរដ្ឋ បន្លំនៅចំណុចភូមិចក្រង់ ឃុំកសាង ស្រុកចិត្តបុរី ខេត្តក្រចេះ តាមរយៈកម្លាំងនគរបាលខេត្តក្រចេះ សហការគ្នាជាមួយកម្លាំងនគរបាលខេត្តស្ទឹងត្រែង ក្រោយមកក៏បញ្ជូនជនសង្ស័យទាំងយប់ទៅម្ចាស់ករណី គឺនគរបាលខេត្តរតនគិរី ។
មកទល់នឹងថ្ងៃនេះ គេពុំដឹងថា ជនសង្ស័យត្រូវបានឃុំខ្លួន ឬដោះលែងនៅឡើយទេកាលពីរសៀលថ្ងៃទី២៨ ខែកក្កដា ឆ្នាំ២០១៥ ដោយពុំមានប្រភពណាត្រូវបានទម្លាយ ។
នៅក្នុងវីដេអូឃ្លីប ដែលអាជីវករថតបាន ពិតជាបានឃើញអំពីសកម្មភាពរបស់ជនជាតិបរទេស ប្រុស ស្រី២នាក់នេះ បានប្រើប្រាស់គ្រប់រូបភាពដើម្បីបន្លំយកប្រាក់ ប្តូរប្រាក់ ដោយពួកគេប្រើវិធីបន្លំ ធ្វើឲ្យប្រជាពលរដ្ឋខ្លះដែលពុំបានជួបប្រទះ និងរងគ្រោះប្រឈមនឹងការខាតបង់ប្រាក់ ។ ដូច្នេះ សូមបងប្អូនប្រជាពលរដ្ឋតាមរាជធានី-ខេត្តជាអាជីវករ មេត្តាប្រុងប្រយ័ត្នចំពោះគំនិតទុច្ចរិតរបស់ជនខិលខូចប្រភេទនេះ ដើម្បីការពារពីផលបាត់បង់ទ្រព្យសម្បតិ្តដោយប្រការណាមួយ ៕ សុខ ខេមរ៉ា
