មុនពេលធ្វើប្រជាមតិនៅក្នុងខែមិថុនា ដែលអង់គ្លេសនឹងចាកចេញពីសមាជិកសហភាពអឺរ៉ុបនោះ អ្នកវិនិយោគនៅអាស៊ីជាច្រើនបានមើលឃើញថា ទីផ្សារអចលនទ្រព្យរបស់អង់គ្លេសនឹងផ្អាកជាបណ្ណោះអាសន្ន។
លោក David Green Morgan នាយកស្រាវជ្រាវទីផ្សារសកលរបស់ក្រុមហ៊ុន JLL បានមានប្រសាសន៍ថា មិនមែនជាការឈប់វិនិយោគនោះទេ ប៉ុន្តែគ្រាន់តែការវិនិយោគត្រូវបានកាត់បន្ថយក្នុងរយៈពេល ៣ខែដំបូងក្នុងឆ្នាំ២០១៦ បើធៀបនឹងការវិនិយោគកាលពីរយៈពេលដូចគ្នាកាលពីឆ្នាំមុន។
ដោយយោងទៅតាមតួលេខដែលផ្តល់ដោយក្រុមហ៊ុន JLL ទំហំនៃប្រតិបត្តិការអចលនទ្រព្យនៅក្នុងប្រទេសអង់គ្លេសមានចំនួន ១០,៤ពាន់លានផោន(១៤,៨៣ពាន់លានដុល្លារសហរដ្ឋអាមេរិក) នៅក្នុងត្រីមាសទី១នៃឆ្នាំ២០១៦ ពោលគឺធ្លាក់ចុះ ១៥,៤ពាន់លានផោនក្នុងរយៈពេលដូចគ្នាកាលពីឆ្នាំមុន។ ស្រដៀងគ្នានេះដែរ ទីផ្សារពាណិជ្ជកម្មត្រូវបានគេមើលឃើញថាទំហំនៃប្រតិបត្តិការធ្លាក់ចុះចំនួន ៣៥ភាគរយ។
លោក Green Morgan បានបន្ថែមទៀតថា មានការព្រួយបារម្ភពីភាគីអ្នកទិញ និងអ្នកលក់ ពីព្រោះថា វាមិនទាន់មានភាពច្បាស់លាស់ថាតើ ការចាកចេញរបស់អង់គ្លេសមានន័យយ៉ាងដូចម្តេចចំពោះសេដ្ឋកិច្ចអង់គ្លេស វាមានភាពស្មុគស្មាញយ៉ាងខ្លាំងថា អ្នកមិនអាចប្រថុយទៅលើអ្វី ដែលវានឹងកើតឡើងនោះទេ ហើយភាពមិនច្បាស់លាស់នេះហើយ ដែលអ្នកវិនិយោគមិនចូលចិត្តបំផុត។
ចាប់តាំងពីមានការប្រកាសធ្វើប្រជាមតិមក មានការលើកឡើងថា អ្នកធ្វើប្រជាមតិនៅតែស្រពេចស្រពឹលថា តើអង់គ្លេសគួរតែចាកចេញពីសហភាពអឺរ៉ុប ឬយ៉ាងណា? ហើយអ្នកវិភាគបានប្រកាសជាថ្មីចំពោះការចាកចេញរបស់អង់គ្លេសថា នឹងអាចបង្កភាពភ័យខ្លាចយ៉ាងខ្លាំងចំពោះសេដ្ឋកិច្ចអង់គ្លេស។ លោកស្រី Christine Lagarde ប្រធានមូលនិធិរូបិយវត្ថុអន្តរជាតិក៏បានព្រមានផងដែរថា ការចាកចេញនេះនឹងបង្កនូវហានិភ័យដល់សេដ្ឋកិច្ចសាកលលោក។
នេះបង្កឱ្យមានការភ័យខ្លាចក្នុងចំណោមអ្នកវិនិយោគ។ ដោយយោងទៅតាមក្រុមហ៊ុនវិនិយោគ CBRE បានឱ្យដឹងថា អ្នកវិនិយោគនាពេលបច្ចុប្បន្ននេះកំពុងតែរង់ចាំមើល នៅពេលដែលមានភាពមិនច្បាស់លាស់ពីការចាកចេញរបស់អង់គ្លេសនេះ។
ក្រុមហ៊ុនពិគ្រោះយោបល់ផ្នែកអចលនទ្រព្យ Kinght Frank បានបញ្ជាក់ថា ការធ្លាក់ចុះនៃសកម្មភាពអចលនទ្រព្យរបស់អង់គ្លេសនឹងកាន់តែមាន ខណៈដែលថ្ងៃនៃការធ្វើប្រជាមតិកាន់តែខិតជិតមកដល់។
ខណៈដែលទីផ្សារនេះកាន់តែស្ងៀមស្ងាត់នោះ អ្នកវិភាគបានឱ្យដឹងថា ប្រាក់របស់អ្នកទិញកាន់តែថយចំពោះទីផ្សារនៅអង់គ្លេស៕
ដោយ៖ រ័ត្ន
