ខេត្តកំពង់ឆ្នាំង៖ លំនៅស្ថានប្រជាពលរដ្ឋនៅស្រុកចំនួន២ក្នុងខេត្តកំពង់ឆ្នាំង ត្រូវបានរងនូវផលប៉ះពាល់ដោយសារបាតុភូតធម្មជាតិនៃគ្រោះមហន្តរាយ
ស្នងការនគរបាលខេត្តកំពង់ឆ្នាំង លោកឧត្តមសេនីយ៍ត្រី ប្រាក់ វុឌ្ឍី បានឲ្យដឹងថា ចំពោះករណីខ្យល់កន្ត្រាក់យ៉ាងខ្លាំងនារសៀលថ្ងៃទី១៩ ខែមិថុនា ឆ្នាំ២០១៦នេះ បានបង្កឲ្យផ្ទះរបស់ប្រជាពលរដ្ឋចំនួន១៤៩ខ្នងបានដួលរលំនិងប៉ើងដំបូលស្ថិតនៅស្រុកកំពង់ត្រឡាចនិងស្រុកសាមគ្គីមានជ័យ ។ ក្នុងនោះស្រុកកំពង់ត្រឡាចមានផ្ទះប្រជាពលរដ្ឋចំនួន៨១ខ្នងបានរងការខូចខាតដោយសារខ្យល់កន្ត្រាក់ ៦១ខ្នងក្នុងនោះដួលរលំ និង២៣ខ្នងប៉ើងដំបូលចំនួន ដែលភាគច្រើនស្ថិតនៅឃុំលង្វែក និង ឃុំអំពិលទឹក ស្រុកកំពង់ត្រឡាច ។ ចំណែកឯស្រុកសាមគ្គីមានជ័យ ករណីខ្យល់កន្ត្រាក់បានធ្វើឲ្យខូចខាត ផ្ទះប្រជាពលរដ្ឋ ចំនួន៦៥ខ្នងបានរងផលប៉ះពាល់យ៉ាងខ្លាំង ។ ក្នុងនោះ៥ខ្នងដួលរលំ និង៦០ខ្នងទៀតប៉ើងដំបូល។
ជាមួយគ្នានេះ ដំបូលសាលារៀនក៏រងការខូចខាតផងដែរក្នុងគ្រោះធម្មជាតិមួយនេះ ហើយគ្រោះមហន្តរាយខ្យល់កន្រ្តាក់នេះមិនបង្កឲ្យមានគ្រោះថ្នាក់ដល់មនុស្សនិងសត្វនោះទេ៕
ដោយ៖ ចន្ថា
