ភ្នំពេញ៖ បុរសម្នាក់ជិះម៉ូតូម៉ាក YAMAHA FZ ក្នុងល្បឿនលឿនជ្រុលធ្លាក់ជង្ហុកដែលមានទឹកលិចដួលបោកក្បាលរងរបួសធ្ងន់ត្រូវបញ្ចូនទៅមន្ទីរពេទ្យភ្លាមៗ ។

ហេតុការណ៍នេះបានកើតឡើងកាលពីវេលា​ម៉ោង៩និង៤០នាទីយប់ថ្ងៃទី១៩ ខែមិថុនា ឆ្នាំ២០១៦ នៅមុខការ៉ាស់សាំងកាល់តិចអូរដឹម  ភូមិអូរដឹម សង្កាត់ចោមចៅ ខណ្ឌពោធិ៍សែនជ័យ ។

ប្រភពពីកន្លែងកើតហេតុឲ្យដឹងថា ជនរងគ្រោះឈ្មោះ ញឹុល ស៊ីដេត ភេទប្រុស អាយុ២០ឆ្នាំ មានទីលំនៅភូមិតេជោអង្កាញ់ ឃុំតេជោអភិវឌ្ឍន៍ ស្រុកឈូក ខេត្តកំពត ។

ប្រភពបន្តថា នៅមុនពេលកើតហេតុគេឃើញជនរងគ្រោះជិះម៉ូតូម៉ាក YAMAHA FZ  ពណ៌ក្រហម ពាក់ស្លាកលេខ ភ្នំពេញ 1BV-8090 ទិសដៅពីកើតទៅលិច តាមបណ្តោយផ្លូវជាតិលេខ៤ លុះមកដល់ចំណុចកើតហេតុជាកន្លែងជង្ហុកទឹកលិចលុបបាត់ចញ្ចើមផ្លូវសឹងជិះមិនកើត ហើយជនរងគ្រោះជិះលឿនទៀតនោះទើបបណ្តាលឲ្យជ្រុលធ្លាក់ជង្ហុកដួលពីរបីត្រឡប់បែកមុខបែកមាត់សន្លប់ស្តូកស្តឹង ។

ក្រោយពេលកើតហេតុជនរងគ្រោះត្រូវបានក្រុមសង្គ្រោះបន្ទាន់៧១១ កងពល៧០ មកដឹកទៅសង្គ្រោះនៅមន្ទីរពេទ្យព្រះកុសុមៈ ដោយឡែកម៉ូតូជនរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលចោមចៅដើម្បីរង់ចាំម្ចាស់មកយកទៅវិញ ៕

ដោយ៖ សុខាសែនជ័យ