ភ្នំពេញ៖ជាងធ្វើកញ្ចក់ និងធ្វើស៊ុមទូរកញ្ចក់២នាក់ត្រូវបានខ្សែភ្លើងឆក់បណ្តាលឲ្យរងរបួសធ្ងន់ម្នាក់ស្រាល
ហេតុការណ៍ខាងលើនេះបានបង្កឲ្យមានការភ្ញាក់ផ្អើលឡើងនៅវេលាម៉ោង១២និង៣០នាទីថ្ងៃត្រង់ថ្ងៃទី២២ ខែមិថុនា ឆ្នាំ២០១៦ នៅលើកំណាត់ផ្លូវ៣៧១ ទល់មុខរោងចក្រទឹកស៊ីអ៊ីវសញ្ញារូបគោ ក្នុងផ្ទះបើកសិប្បកម្មធ្វើកញ្ចក់លេខ៦០៨ ស្ថិតក្នុងភូមិឬស្សី សង្កាត់ស្ទឹងមានជ័យ ខណ្ឌមានជ័យរាជធានីភ្នំពេញ។
ប្រភពសាក្សីនៅកន្លែងកើតហេតុបានប្រាប់ឲ្យដឹងថា មុនពេលកើតហេតុជនរងគ្រោះទាំង២នាក់ខាងលើជិះរ៉ឺម៉កដឹកដែកអាលុយមីញ៉ូមមកពីលិច ហើយក៏ឈប់នៅហាងធ្វើកញ្ចក់ បន្ទាប់មកគេម្នាក់ឡើងទៅលើហើយម្នាក់នៅខាងក្រោមចាំជួយលើដែកអាលុយមី ញ៉ូម ហើយម្នាក់ក៏ឈូងចាប់ដែកទាញឡើងទៅលើ។ ដោយពុំបានប្រយ័ត្នមើលខ្សែភ្លើងស្រាតក៏ប៉ះទុស្សេបណ្តាលឲ្យឆក់តែម្តង តែមិនគ្រោះថ្នាក់ដល់អាយុជីវិតឡើយ។
ភ្លាមៗនោះកម្លាំងសមត្ថកិច្ចនគរបាលប៉ុសិ៍្តស្ទឹងមានក៏បានចុះដល់កន្លែងកើតហេតុ លោកនាយនគរបាលប៉ុសិ៍្ត ម៉ៅ សាវឿន បានប្រាប់ឲ្យដឹងថា ជនរងគ្រោះមានឈ្មោះ ផាត សុម៉ាច ភេទប្រុស អាយុ១៨ឆ្នាំ (របួសធ្ងន់រលាក់រលាត់ពេញខ្លួនប្រាណ) និងឈ្មោះ ហួន វណ្ណី ភេទប្រុស អាយុ៣៤ឆ្នាំ (របួសស្រាលរលាត់បាតដៃ) ហើយត្រូវបានបញ្ជូនទៅកាន់មន្ទីរពេទ្យភ្លាមផងដែរ។
លោកនាយប៉ុសិ៍្តដដែលបន្តថា ផ្ទះកើតហេតុនេះជនរងគ្រោះបានជួលគេដើម្បីសិប្បកម្មធ្វើកញ្ចប់ ហើយបើតាមប្រជាពលរដ្ឋបានឃើញហេតុការណ៍និយាយថា មុនពេលកើតហេតុជនរងគ្រោះបានលើកដែកទៅលើដោយមិនបានប្រយ័ត្នក៏ប៉ះនិងខ្សែភ្លើងកាប្លិ៍ស្រាតបណ្តាលឲ្យឆក់តែសំណាងល្អមិនគ្រោះថ្នាក់ដល់អាយុជីវិត៕
ដោយ៖ តាឡឹម
