ខេត្តកណ្ដាល: ឃោរឃៅជាងសត្វទៅទៀត ស្ត្រីជាម្ដាយច្របាច់កសម្លាប់កូនខ្លួនឯងក្នុងបន្ទប់ទឹក រួចច្រកក្នុងថង់ប្លាស្ទិកយកទៅបោះចោលក្នុងប្រឡាយទឹកទាំងគ្មានអាសូរ ៨ថ្ងៃក្រោយទើបគេប្រទះឃើញសពទារកអណ្ដែតយ៉ាងអាណោចអាធ័ម ហើយនៅទីបំផុតស្ត្រីសង្ស័យជាម្ដាយត្រូវបានសមត្ថកិច្ចឃាត់ខ្លួន ។ ករណីឃាតកម្មនេះកើតឡើងកាលពីថ្ងៃទី២៩ ខែឧសភា ឆ្នាំ២០២៣ វេលាម៉ោង១៦និង១០នាទី នៅចំណុចភូមិប្រឡាយ ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល ដែលការចាប់ឃាត់ខ្លួននេះ ធ្វើឡើងនៅថ្ងៃទី៥ ខែមិថុនា ឆ្នាំ២០២៣។
មន្ត្រីនគរបាលស្រុកកណ្ដាលស្ទឹងបានឱ្យដឹងថា ជនរងគ្រោះ០១នាក់(ទារក)។ ជនសង្ស័យឈ្មោះ ណាវ សៅរី ភេទស្រី អាយុ៣៩ឆ្នាំ រស់នៅភូមិប្រឡាយ ឃុំបឹងខ្យាង ស្រុកកណ្ដាលស្ទឹង ខេត្តកណ្ដាល មុខរបរមិនពិតប្រាកដ (ឃាត់ខ្លួន)។ វត្ថុតាងចាប់យករួមមានថង់ប្លាស្ទិក ពណ៌ខ្មៅ០១។
ប្រភពដដែលបន្តថា តាមចម្លេីយសារភាពរបស់ស្ត្រីសង្ស័យឈ្មោះ ណាវ សៅរី ដែលត្រូវជាម្តាយទារកខាងលេីបានអោយដឹងថា៖ នៅថ្ងៃទី២៩ ខែឧសភា ឆ្នាំ ២០២៣ វេលាម៉ោង០៤ទៀបភ្លឺ ខ្លួនបានឈឺពោះ ពេលនោះខ្លួនបានទៅបន្ទប់ទឹកបត់ជេីងធំ ស្រាប់តែសម្រាលកូនធ្លាក់ចូលក្នុងចានបង្គន់ ពេលនោះខ្លួនបានយកដៃស្តាំច្របាច់កទារកលេីកឡេីងលេីប្រហែលជាដប់នាទីទេីបជនសង្ស័យដាក់ទារកចុះលេីឥដ្ឋការ៉ូក្នុងបន្ទប់ទឹក រួចខ្លួនបានអង្គុយមេីលទារកប្រហែលកន្លះម៉ោងពុំឃេីញទារកកម្រេីក ហេីយពុំដឹងទារកស្លាប់ឬរស់ ខ្លួនក៏សម្រេចចិត្តយកថង់ប្លាស្ទិកពណ៌ខ្មៅមកដាក់ទារកចូលក្នុងថង់ប្លាស្ទិកនោះហេីយមូរមាត់ថង់ជិត រួចលេីកថង់ប្លាស្ទិកនោះដាក់ក្នុងសំពត់ដេីរយកទៅបោះចោលក្នុងទឹកប្រឡាយ ពេលទៅដល់មាត់ប្រឡាយខ្លួនបានឈរខាងកេីតគុម្ពឬស្សីរួចបោះទារកដែលច្រកក្នុងថង់ចូលទៅក្នុងប្រឡាយ ទើបខ្លួនបានដេីរត្រឡប់មកផ្ទះវិញ ពេលមកដល់ផ្ទះបានប្រហែល ០៥នាទីខ្លួនបានដេីរត្រឡប់ទៅមាត់ប្រឡាយវិញឃើញថង់ប្លាស្ទិកដាក់ទារកនោះមិនទាន់លិចចូលទៅក្នុងទឹកប្រឡាយខ្លួនក៏បានទៅទាញថង់នោះបេីកមាត់ថង់ចាក់ទារកចូលក្នុងទឹកប្រឡាយរួចខ្លួនប្រញាប់មកផ្ទះវិញព្រោះខ្លាចគេឃេីញដោយពុំបានមេីលថាទារកនោះលិចឬអណ្តែតទេ ពេលមកដល់ផ្ទះខ្លួនបានងូតទឹកសម្អាតខ្លួនហេីយទៅធ្វើការងាររោងចក្រម្តុំផ្សារសៀមរាបដូចសព្វដង។
មូលហេតុដែលជនសង្ស័យសម្រេចចិត្តសម្លាប់ទារកនោះចោលព្រោះខឹងប្តីរបស់ខ្លូនមិនទទួលស្គាល់ថាជាកូនរបស់ខ្លូនទាំងពីរនាក់ ខ្លាចក្រុមគ្រួសារបងប្អូនដឹងព្រោះខ្លួនមានផ្ទៃពោះជាមួយប្តីរបស់ខ្លូនគឺលាក់ពុំអោយក្រុមសារបងប្អូនដឹងទេ ។
បច្ចុប្បន្នជនសង្ស័យខាងលេីកំពុងឃាត់ខ្លួននៅអធិការដ្ឋាននគរបាលស្រុកកណ្ដាលស្ទឹងដេីម្បីកសាងសំណុំរឿងតាមនីតិវិធីច្បាប់៕ ដោយស្អាងជ័យ
