ខេត្តមណ្ឌលគិរី ៖ របាយការណ៍របស់ក្រសួងរ៉ែនិងថាមពលបានឲ្យដឹងថា គិតត្រឹមដើមខែមិថុនា ឆ្នាំ ២០២៣នេះកម្ពុជាចម្រាញ់រ៉ែមាសបានទម្ងន់ ៦.៧២៧ គីឡូក្រាម និងរកចំណូលពីសួយសារ បានជាង១០លានដុល្លារ។

ក្រសួងរ៉ែ និងថាមពល បានបញ្ជាក់ថា «បន្ទាប់ពីបានសម្ពោធដាក់ឲ្យដំណើរការការដ្ឋាន និងរោងចក្រចម្រាញ់រ៉ែមាសនេះ ជាផ្លូវការនៅថ្ងៃទី២១ ខែមិថុនា ឆ្នាំ២០២១ មកទល់នឹងពេលបច្ចុប្បន្ននេះ ក្រុមហ៊ុនរ៉ឺនេសង់មីនើរ៉ល (ខេមបូឌា) លីមីធីត បានចម្រាញ់មាស ដែលមានគុណភាព៩០% បានសរុប៦,៧២៧.៧០ គីឡូក្រាម។ ក្រុម ហ៊ុនបានបង់សួយសារជូនរដ្ឋសរុបចំនួន១០,២២៨, ២៣៩ដុល្លារ» ដែលការដ្ឋានអាជីវកម្ម និងរោងចក្រចម្រាញ់រ៉ែមាស ក្នុងតំបន់អូរខ្វាវ ស្រុកកែវសីមា ខេត្តមណ្ឌលគិរី ។

ការចម្រាញ់រ៉ែមាសពីតំបន់អូរខ្វាវស្រុកកែវសីមា នៃខេត្ត មណ្ឌលគិរី ដោយទទួលបានចំណូលសួយសារពីក្រុម ហ៊ុន​ Renaissance Minerals បានជាង ១០លានដុល្លារអាម៉េរិក ក្នុងរយៈពេល២ឆ្នាំ នៃប្រតិបត្តិការ គិតត្រឹមពាក់កណ្តាលខែមិថុនា ឆ្នាំ២០២៣ ។ សេចក្ដី ប្រកាសព័ត៌មាន របស់ក្រសួងរ៉ែ និងថាមពលបង្ហាញថា គិតមកទល់សព្វថ្ងៃ រោងចក្រចម្រាញ់«រ៉ែមាស»នេះ​ ដំណើរការបានរយៈពេល២ឆ្នាំហើយ​ដោយក្រុមហ៊ុន Renaissance Minerals (Cambodia) Limited របស់ប្រទេសអូស្ត្រាលី ក្រោមទុនវិនិយោគ ១២០លានដុល្លារ។

បច្ចុប្បន្ន ក្រុមហ៊ុនចម្រាញ់មាសមានគុណភាព ៩០ ភាគរយបានចំនួន ៦,៧២៧ គីឡូក្រាម។ ក្រុមហ៊ុនបង់សួយសារជូនរដ្ឋ បានជាង១០.២លានដុល្លារ ។ ក្រសួង រ៉ែ និងថាមពល លើកឡើងថា ដំណើរការឧស្សាហកម្មអាជីវកម្មធនធានរ៉ែ ដែលក្រុមហ៊ុន Renaissance Minerals សម្រេចបាននេះ បានរួមចំណែកដល់ការ បង្កើតប្រភពចំណូលថវិកាជាតិ ហើយកំពុងបង្កើតបាននូវសមត្ថភាពជាតិ និងគំរូថ្មី សម្រាប់ការធ្វើអាជីវកម្មធនធានរ៉ែ ប្រកបដោយការទទួលខុសត្រូវ និងការអភិវឌ្ឍប្រកបដោយចីរភាព។

សមិទ្ធផលនៃដំណើរការចម្រាញ់រ៉ែមាសរបស់កម្ពុជានេះ គឺជាសក្ខីភាពយ៉ាងជាក់​ច្បាស់​នូវការខិតខំប្រឹងប្រែងរបស់រាជរដ្ឋាភិបាល ក្នុងការបង្កើតបាននូវបរិស្ថានវិនិយោគ សមប្រកប​សម្រាប់​ទាក់ទាញវិនិយោគទុនពីក្រៅប្រទេស ​និង​ ការបង្កើតបាននូវខឿនឧស្សាហកម្មថ្មីមួយ ប្រកបដោយការទទួលខុសត្រូវលើបរិស្ថាន ​និងសង្គម តាមស្តង់ដារអន្តរជាតិ។ លើសពីនេះ ដំណើរការឧស្សាហកម្មចម្រាញ់រ៉ែមាស​ អនុញ្ញាតឲ្យកម្ពុជា អាចទាញយកបាននូវ​ធនធានរ៉ែ ​ជាសម្បត្តិធម្មជាតិដ៏មាន តម្លៃរបស់ខ្លួន ​ដើម្បី​ធ្វើការ​អភិវឌ្ឍ​សេដ្ឋកិច្ចជាតិ និងសង្គម បង្កើត​បាន​នូវផលប្រយោជន៍រយៈពេល​វែង ​សម្រាប់​ប្រជាជនកម្ពុជា​ជាច្រើន។

គម្រោងអាជីវកម្មរ៉ែមាសនេះ បានផ្តល់ការងារសរុបចំនួន ៤៣៤ នាក់ ក្នុងនោះជនជាតិខ្មែរមានចំនួន ៣៤៧នាក់ (ក្នុងនោះស្រីចំនួន ៦១នាក់) និងជនជាតិបរទេសចំនួន ៨៧នាក់ (ក្នុងនោះស្រីចំនួន ៣នាក់) ៕ដោយ៖សុរិយា