ភ្នំពេញ : រដូវធ្លាក់ភ្លៀង និងខ្យល់បក់កន្ត្រាក់ខ្លាំង ធ្វើឲ្យដើមឈើមួយដើមបាក់ សង្កត់ម៉ូតូមួយគ្រឿង រងរបួសមនុស្សម្នាក់ កាលពីវេលាម៉ោង ៥ល្ងាច ថ្ងៃទី២៦ ខែមិថុនា ឆ្នាំ២០២៣ ចំណុចសួនច្បារហាត់ប្រាណ តាមផ្លូវលេខ១៦៩ ជិតQK CLUB ក្នុងសង្កាត់មិត្តភាព ខណ្ឌ៧មករា រាជធានីភ្នំពេញ។
បន្ទាប់ពីទទួលដំណឹងភ្លាម លោក ថេង សុថុល អភិបាល នៃគណៈអភិបាលខណ្ឌ៧មករា បានដឹកនាំបញ្ជាកម្លាំងសណ្តាប់ធ្នាប់ខណ្ឌ ចុះកាត់ដើមឈើដែលបាក់ចេញ និង ជួយសម្រួលចរាចរណ៍ ដើម្បីកុំឲ្យកក់ស្ទះ និង បានបញ្ជូនជនរងគ្រោះដែលរងរបួសទៅមន្ទីរពេទ្យផងដែរ ។
សូមបញ្ជាក់ថា : បងប្អូនត្រូវមានការប្រុងប្រយ័ត្នខ្ពស់ ដោយសាររដូវភ្លៀងធ្លាក់ អាចនឹងមានខ្យល់កន្ត្រាក់ ផ្គររន្ទះ កើតឡើងដោយយថាហេតុ។
កន្លងមកក្រសួងធនធានទឹក និងឧតុនិយម បានចេញសេចក្តីជូនដំណឹង ស្តីពី ស្ថានភាពធាតុអាកាស ដោយបញ្ជាក់ថា : ( ចាប់ពីថ្ងៃទី ២១ – ២៧ ខែមិថុនា ឆ្នាំ២០២៣ ) ក្នុងរយៈពេលមួយសប្តាហ៍ខាងមុខ ព្រះរាជាណាចក្រកម្ពុជា នឹងទទួលឥទ្ធិពលពីជ្រលងនៃតំបន់សម្ពាធទាបនៅលើប្រទេសចិន និងខ្យល់មូសុងនិរតីក្នុងកម្រិតមធ្យម ។
លក្ខណៈបែបនេះនឹងធ្វើឲ្យ ៖
១-តំបន់ទំនាបកណ្តាល ៖
– សីតុណ្ហភាពអប្បបរមា មានពី ២៤-២៦ °C
– សីតុណ្ហភាពអតិបរមា មានពី ៣៤-៣៦ °C
– អាចមានភ្លៀងធ្លាក់ក្នុងកម្រិតពីតិចទៅមធ្យម លាយឡំដោយផ្គរ រន្ទះ និងខ្យល់កន្ត្រាក់ ។
២-តំបន់ខ្ពង់រាប ៖
– សីតុណ្ហភាពអប្បបរមា មានពី ២៤-២៦ °C
– សីតុណ្ហភាពអតិបរមា មានពី ៣៣-៣៥ °C
– អាចមានភ្លៀងធ្លាក់ក្នុងកម្រិតពីតិចទៅបង្គួរ លាយឡំដោយផ្គរ រន្ទះ និងខ្យល់កន្រ្តាក់ ។
៣-តំបន់មាត់សមុទ្រ ៖
– សីតុណ្ហភាពអប្បបរមា មានពី ២៥-២៧ °C
– សីតុណ្ហភាពអតិបរមា មានពី ៣១-៣៣ °C
– អាចមានភ្លៀងធ្លាក់ក្នុងកម្រិតពីខ្សោយទៅមធ្យម លាយឡំដោយផ្គរ រន្ទះ និងខ្យល់កន្ត្រាក់ ។
អាស្រ័យដូចបានជម្រាបជូនខាងលើ សូមសាធារណជនទទួលជ្រាបជាព័ត៍មាន និងបង្កើនការប្រុងប្រយ័ត្នចំពោះបាតុភូតធម្មជាតិដែលអាចកើតមានឡើងជាយថាហេតុ ៕
ដោយ : សិលា
