ឥណ្ឌាត្រូវបានគេរំពឹងថានឹងបាញ់បង្ហោះយានអវកាស Chandrayan-3 នៅថ្ងៃទី 14 ខែកក្កដា ជាមួយនឹងបេសកកម្មស្រាវជ្រាវព្រះច័ន្ទ។ ប្រសិនបើអនុវត្តបានជោគជ័យ ព្រឹត្តិការណ៍នេះនឹងសម្គាល់ឥណ្ឌាក្លាយជាប្រទេសទីបួនដែលចុះចតលើឋានព្រះច័ន្ទ បន្ទាប់ពីអាមេរិក រុស្ស៊ី និងចិន។

យោងតាមអង្គការស្រាវជ្រាវអវកាសឥណ្ឌា (ISRO) យាន Chandrayaan-3 នឹងត្រូវបាញ់បង្ហោះទៅកាន់ទីអវកាសពីមជ្ឈមណ្ឌលអវកាសសំខាន់ក្នុងរដ្ឋ Andhra Pradesh ភាគខាងត្បូងប្រទេសឥណ្ឌា នៅវេលាម៉ោង 14:35′ ថ្ងៃទី 14 ខែកក្កដា ម៉ោងក្នុងស្រុក ។
ប្រសិនបើផែនការបាញ់បង្ហោះដំណើរការល្អ Chandrayaan-3 ត្រូវបានគេរំពឹងថានឹងចុះចតលើផ្ទៃព្រះច័ន្ទនៅថ្ងៃទី 23 ខែសីហា។ បន្ទាប់ពីចុះចត យានចតកម្ពស់ 2 ម៉ែត្រនឹងដាក់ពង្រាយយាននៅទីតាំងក្បែរប៉ូលខាងត្បូងរបស់ព្រះច័ន្ទ ដើម្បីធ្វើការរុករក និងធ្វើការពិសោធន៍ជាបន្តបន្ទាប់ក្នុងរយៈពេលពីរសប្តាហ៍។
Chandrayaan-3 ត្រូវបានបង្កើតឡើងជាមួយនឹងការវិនិយោគប្រហែល 75 លានដុល្លារ។ នេះគឺជាបេសកកម្មដ៏សំខាន់ដំបូងគេចាប់តាំងពីរដ្ឋាភិបាលរបស់នាយករដ្ឋមន្ត្រី Narendra Modi បានប្រកាសពីគោលនយោបាយជំរុញការវិនិយោគលើការរុករកអវកាសដែលដំណើរការដោយឯកជន និងគំរូអាជីវកម្មទាក់ទងនឹងការអភិវឌ្ឍន៍ និងការបង្ហោះផ្កាយរណប។
លោក Ajey Lele ទីប្រឹក្សានៅវិទ្យាស្ថាន Manohar Parrikar សម្រាប់ការសិក្សា និងវិភាគផ្នែកការពារជាតិក្នុងទីក្រុង New Delhi បាននិយាយថា “បេសកកម្មដ៏ជោគជ័យមួយនឹងជួយលើកកម្ពស់មុខតំណែងរបស់ឥណ្ឌានៅលើមាត្រដ្ឋានពិភពលោក និងនាំមកនូវផលប្រយោជន៍ដោយប្រយោលលើផ្នែកពាណិជ្ជកម្មនៃឧស្សាហកម្មនេះ” ។
យោងតាមលោក Carla Filotico នាយកគ្រប់គ្រងនៅក្រុមហ៊ុនប្រឹក្សា SpaceTec Partners គោលដៅរបស់ឥណ្ឌាគឺចង់ក្លាយជាអ្នកដឹកនាំម្នាក់ក្នុងវិស័យអវកាស ហើយការបាញ់បង្ហោះនេះអាចជាឱកាសសម្រាប់ឥណ្ឌាក្នុងការសម្រេចគោលដៅនេះ។
ក្នុងឆ្នាំ 2020 ISRO បានបាញ់បង្ហោះ Chandrayaan-2 ចូលទៅក្នុងគន្លងផែនដីដោយជោគជ័យ ប៉ុន្តែ Lander និង Rover ត្រូវបានបំផ្លាញនៅក្នុងការបុកគ្នានៅជិតទីតាំងដែល Chandrayan-3 ត្រូវបានគេរំពឹងថានឹងចុះចត៕

រូប​ថត​: TTXVN-VNA