ភ្នំពេញ ៖ គ្រោះអគ្គិភ័យបានឆាបឆេះឃ្លាំងសិប្បកម្មដេរពូកសាឡុង និងរថយន្តPajeroមួយគ្រឿងរបស់ប្រជាពលរដ្ឋ រួមនឹងសម្ភារមួយចំនួនយ៉ាងសន្ធោសន្ធៅ បង្កការភ្ញាក់ផ្អេីលនៅវេលាម៉ោង១៦និង៥០នាទីរសៀលថ្ងៃព្រហស្បតិ៍ ១១រោច ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៣ ខែកក្កដា ឆ្នាំ២០២៣ នៅចំណុចសិប្បកម្មដេរពូកសាឡុង ស្ថិតក្នុងភូមិតាងៅក្រោម សង្កាត់និរោធ ខណ្ឌច្បារអំពៅ រាជធានីភ្នំពេញ។
សមត្ថកិច្ចមូលដ្ឋានបានឱ្យដឹងថា ម្ចាស់ទីតាំងខាងលេីមានឈ្មោះ សុខ ចន្ទី ភេទប្រុស អាយុ៣៩ឆ្នាំ ជនជាតិវៀតណាម ។ រីឯឃ្លាំងសិប្បកម្មខាងលេីនេះជាប្រភេទសំណង់ ទំហំ១៥ម៉ែត្រ X ២០ម៉ែត្រ ដោយការឆាបឆេះនេះបានធ្វេីឱ្យខូចខាតសម្ភារក្នុងឃ្លាំងសិប្បកម្មមានដូចជា ៖ ម៉ាស៊ីនដេរនិងផុងចំនួន ០៥គ្រឿង, រថយន្ត PAJEROចំនួន ០១គ្រឿង, ម៉ូតូ Honda Air Black ចំនួន ០១គ្រឿង និងឆេះរាលដាលដល់ផ្ទះឈើប្រក់ស័ង្កសីចំនួន០១ខ្នងអស់ទាំងស្រុង និងផ្ទះថ្មចំនួន០១ខ្នង (ខូចខាតប្រហែល១០%)។
ប្រភពដដែលបានឱ្យដឹងថា ក្នុងករណីគ្រោះអគ្គិភ័យនេះគឺគ្មានមនុស្សរងរបួសឬស្លាប់ឡេីយ ដោយកម្លាំងជំនាញរបស់រថយន្តការិយាល័យអគ្គិភ័យចំនួន ១៥គ្រឿងបានប្រេីប្រាស់ទឹកអស់ចំនួន ៣០ឡានស្មើនឹង១២០ម៉ែត្រគូប ។ ក្នុងនោះមានរថយន្តជំនួយពីអង្គភាពផ្សេង
បានប្រេីប្រាស់ទឹកអស់ចំនួន១៦ឡានផងដែរ ទេីបបានធ្វេីការបាញ់ទឹកពន្លត់ចប់នៅម៉ោង១៨នឹង៥០នាទី នាថ្ងៃខែ ឆ្នាំដដែល ។ ចំពោះមូលហេតុនៃការឆាបឆេះនេះ សមត្ថកិច្ចកំពុងស្រាវជ្រាវបន្ត ៕ 
ដោយ ៖ ភារ៉ា
