ភ្នំពេញ ៖ កម្លាំងនគរបាលក្បាលកោះ កាលពីវេលម៉ោង១០យប់ថ្ងៃទី២៦ ខែមិថុនា ឆ្នាំ២០១៦ បានឃាត់ខ្លួនបុរសម្នាក់ពីបទជួញដូរ ដោយខុសច្បាប់នូវសារធាតុញៀន នៅចំណុចមុខដីឡូត៍គ្មានលេខ ផ្លូវជាតិលេខ១ ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ ។
អធិការរងខណ្ឌច្បារអំពៅលោក ម៉ៅ សឿត បានឲ្យដឹងថា ជនជួញដូរគ្រឿងញៀនរូបនេះនេះ ឈ្មោះ រុន សុធារ៉ា ភេទប្រុស អាយុ៣០ឆ្នាំ ជនជាតិខ្មែរ មុខរបរបើកបរ រថយន្ត ស្នាក់នៅផ្ទះជួល ភូមិជ្រោយអំពិល២ សង្កាត់ក្បាលកោះ ខណ្ឌច្បារអំពៅ។ មុនពេលកើតហេតុ នគរបាលប៉ុស្តិ៍ក្បាលកោះបានជិះម៉ូតូល្បាតក្នុងមូលដ្ឋានរបស់ខ្លួន ហើយបានប្រទះឃើញជនសង្ស័យកំពុងចែកចាយថ្នាំញៀនជិតផ្លូវជាតិលេខ១ ក៏ឃាត់ខ្លួនតែម្តង ។
លោកអធិការរងបញ្ជាក់ឲ្យដឹងផងដែរថា ក្នុងការឃាត់ខ្លួននេះសមត្ថកិច្ចរបស់លោកបានដកហូតវត្ថុតាងរួមមានថ្នាំញៀនប្រភេទ ក្រាមពណ៌សថ្លាចំនួន ៣កញ្ចប់តូច, ម៉ូតូម៉ាក យ៉ាម៉ាហាហ្វ្រេស ពណ៌ខ្មៅ គ្មានស្លាកលេខ លេខម៉ាស៊ិន 201284 ១គ្រឿង។
បច្ចុប្បន្នជនសង្ស័យនិងវត្ថុតាងត្រូវបាននគរបាលខណ្ឌច្បារអំពៅកសាងសំណុំរឿងដើម្បីបញ្ជូនទៅសាលាដំបូងរាជធានីចាត់ការតាមច្បាប់៕
ដោយ៖ ប្រាថ្នា
