ភ្នំពេញ៖ ស្ត្រីម្នាក់ បានរងរបួសធ្ងន់ដោយដួលបោកក្បាលទៅនិងថ្នល់ហូរឈាមតាមមាត់ច្រមុះ ហើយត្រូវបានរថយន្តសង្គ្រោះរបស់មន្ទីរពេទ្យកាល់ម៉ែតដឹកមកយកទៅសង្គ្រោះភ្លាមៗ ខណៈដែលរូបគាត់កំពុងតែជិះម៉ូតូតាមផ្លូវម្នាក់ឯង ស្រាប់តែជនសង្ស័យ២នាក់ជិះម៉ូតូមួយគ្រឿងមកធ្វើសកម្មភាពឆក់កាបូបរបស់គាត់បានសម្រេចនិងគេចខ្លួនដោយសុវត្ថិភាព ។
ករណីខាងលើនេះ បានកើតឡើងនៅម៉ោង១ និង៥០នាទីរសៀលថ្ងៃទី២៧ ខែមិថុនា ឆ្នាំ២០១៦ស្ថិតនៅមុខកន្លែងលក់ឡាន ហាក់ ស្រ៊ុន តាមបណ្ដោយផ្លូវព្រះមុន្នីវង្ស សង្កាត់ស្រះចក ខណ្ឌដូនពេញ ។
បើតាមប្រភពនៅកន្លែងកើតហេតុបានឲ្យដឹងថា មុនពេលកើតគេបានឃើញស្ត្រីរងគ្រោះខាងលើបានជិះម៉ូតូហុងដាឌ្រីម សេ១២៥ ពណ៌ខ្មៅ ពាក់ស្លាកលេខ 1DE-1368 តាមបណ្តោយផ្លូវព្រះមុន្នីវង់ ក្នុងទិសដៅពីជើងទៅត្បូង លុះមកដល់ចំណុចកើតហេតុក៏ស្រាប់លេចមុខសង្ស័យ២នាក់ជិះម៉ូតូសង សេ១២៥ ពណ៌ខ្មៅ មិនចាំស្លាក់លេខ មកធ្វើសកម្មភាពឆក់កាបូបពីស្ត្រីរងគ្រោះខាងលើបណ្តោលឲ្យដួលបោកក្បាល ហូរឈាមតាមច្រមុះ មាត់ រងរបួសធ្ងន់។ ភ្លាមៗនោះរថយន្តសង្គ្រោះរបស់មន្ទីរពេទ្យកាល់ម៉ែតដឹកមកយកទៅសង្គ្រោះភ្លាមៗផងដែរ ។ រឺឯជនសង្ស័យទាំង២នាក់ខាងលើបានជិះម៉ូតូគេចខ្លួនដោយសុវត្ថិភាព ៕
ដោយ៖ ស ដារ៉ា
