ភ្នំពេញ៖ កម្លាំងសមត្ថកិច្ចជំនាញខេត្តសៀមរាប សហការជាមួយសមត្ថកិច្ចរាជធានីភ្នំពេញ ចុះស្រាវជ្រាវឃាត់ខ្លួនបានជនជាតិបរទេសម្នាក់ នៅក្នុងអាកាសយានដ្ឋានអន្ដរជាតិខេត្តសៀមរាប កាលពីថ្ងៃទី២៣ ខែកក្កដា ឆ្នាំ២០២៣នេះ ខណៈជនសង្ស័យរូបនេះបម្រុងហោះចាកចេញពីកម្ពុជា ក្រោយពាក់ព័ន្ធករណីវាយបំផ្លាញម៉ាស៉ីនទូរ ATM របស់ធនាគារវឌ្ឍនៈ នៅសង្កាត់បឹងកេងកងទី១ ខណ្ឌចំការមន រាជធានីភ្នំពេញ។
តាមប្រភពព័ត៍មានពីរបាយការណ៍របស់សមត្ថកិច្ច បានឱ្យដឹងថា ជនសង្ស័យមានឈ្មោះ MULDOON IAN ជាជនជាតិអូស្ដ្រាលី។
យោងតាមពាក្យបណ្ដឹងរបស់អ្នកឧកញ៉ា ឈុន លាង បានបញ្ជាក់ថា ជាជនជាតិអូស្ដ្រាលីរូបនេះ បានធ្វើសកម្មភាពវាយបំផ្លាញម៉ាស៉ីនទូរ ATM របស់ធនាគារវឌ្ឍនៈ កាលពីថ្ងៃទី១០ ខែកក្កដា ឆ្នាំ២០២៣ នៅចំណុចស្មាលមីនី ម៉ាត់ ស្ថិតក្នុងភូមិ៧ សង្កាត់បឹងកេងកងទី១ ខណ្ឌចំការមន។
បច្ចុប្បន្នជនសង្ស័យត្រូវបានសមត្ថកិច្ចជំនាញកំពុងធ្វើការសួរនាំ ដើម្បីចាត់ការបន្ដតាមនីតិវិធី៕
ដោយ៖សហការី
