ខេត្តកំពង់ឆ្នាំង៖ កម្លាំងសមត្ថកិច្ចផ្នែករដ្ឋបាលជលផល កំពង់ប្រាសាទ និងសង្កាត់ជលផល សហការជាមួយកម្លាំងគណៈបញ្ជា ការឯកភាពស្រុកជលគីរី បានបន្តចុះរុះរើ និងបំផ្លាញចោលរបាំងសាច់អួន ចំនួន៥កន្លែង និងរបាំងសាច់ស្បៃមុង ១០កន្លែង ក្នុងភូមិសាស្ត្រស្រុកជលគីរី នៅក្នុងរដូវទឹកទន្លេ កំពុងឡើង ហើយត្រីពងកូន។
បើតាមការបញ្ជាក់ពីនាយផ្នែករដ្ឋបាលជលផលកំពង់ប្រាសាទ លោក ខៀវ សុផានរិទ្ធ បានឱ្យដឹងនៅព្រឹកថ្ងៃទី៣០ ខែកក្កដា ឆ្នាំ២០២៣នេះថា៖ កម្លាំងផ្នែករដ្ឋបាលជលផល កំពង់ប្រាសាទ សង្កាត់ជលផល សហការជាមួយកម្លាំង គណៈបញ្ជាការស្រុកជលគីរី ដោយប្រើប្រាស់កម្លាំង២២នាក់មធ្យោបាយធ្វើសកម្មភាព កាណូតបាឡាស្មាច់ ៥គ្រឿង នៅចំណុចខ្លែងឆ្លុះស្រោងសន្ទៃ ភូមិក្បាលកន្លង់ ជំពាមថង្កូវ ក្នុងភូមិសាស្ត្រស្រុកជលគីរី ខេត្តកំពង់ឆ្នាំង កាលពីថ្ងៃទី២៩ ខែកក្កដាម្សិលមិញនេះ។
នាយផ្នែករដ្ឋបាលរូបនេះ បន្តថា ក្នុងប្រតិបត្តិការបង្ក្រាបខាងលើនេះ កម្លាំងចម្រុះ បានរុះរើ និងបំផ្លាញចោលរបាំងសាច់អួន ៥កន្លែង ប្រវែង ៣០០ ម៉ែត្រ បង្គោល ១០០ដើម លបលូសាច់អួន ៥គ្រឿង និងរបាំងស្បៃមុង ១០កន្លែង ប្រវែង ៦០០ ម៉ែត្រ បង្គោល ១៥០ម៉ែត្រ លូស្បៃមុង ១២គ្រឿង ចាក់លែងកូនត្រីចម្រុះ ចូលទៅក្នុងទន្លេ ដែលក្រុមជន ល្មើសធ្វើសកម្មភាព ដាក់នៅរដូវត្រីពងកូន ។ តែទោះជាយ៉ាងណា នៅក្នុងការបង្ក្រាប បទល្មើសនេសាទ ក្នុងរដូវទឹកទន្លេឡើង គេមិនដែលបានឃាត់ខ្លួនបានក្រុមជនល្មើស ដោយសារពួកគេ ហាក់ដឹងខ្លួនមុន បានគេច ខ្លួនរហូត ។
ជាមួយគ្នានេះ លោក ខៀវ សុផានរិទ្ធ បានអំពាវនាវដល់បងប្អូនប្រជានេសាទទាំងអស់ កុំនេសាទដោយឧបករណ៍ណា ដែលច្បាប់ជលផល ហាមឃាត់ និងកុំនេសាទ នៅក្នុងរដូវទឹកឡើង ត្រីពងកូន ពិសេសកុំកាប់បំផ្លាញព្រៃលិចទឹក ដែលជាជម្រកត្រី និងថនិកសត្វ សម្រាប់ពងកូន៕
ដោយ៖សហការី
