លោក Laurent Blancបានសម្រេចចិត្តចាកចេញពីក្រុម Paris Saint-Germain ក្រោយជួយក្រុមនេះឈ្នះជើងឯករបស់ ប្រទេសបារាំងចំនួន៣រដូវកាលជាប់ៗគ្នា។

គ្រូបង្វឹកសញ្ជាតិបារំាងវ័យ៥០ឆ្នាំនេះបានដឹកនាំក្រុម Paris Saint-Germain ឈ្នះជើងឯកនៅក្នុងប្រទេស បារាំងរហូតក្នុងរយៈពេល៣ឆ្នាំចុងក្រោយនេះ ប៉ុន្តែពួកគេបានធ្លាក់ពីក្របខ័ណ្ឌ Champions League នៅវគ្គ៨ក្រុមចុងក្រោយ៣ឆ្នាំជាប់ៗគ្នាផងដែរ ។

គ្រូបង្វឹកដែលអាចមកជំនួសតំណែង របស់លោក Laurent Blanc បានគឺលោក Umai Emery គ្រូបង្វឹករបស់ក្លិប Sevilla។ លោក Umai Emery ដែលមានវ័យ៤៤ឆ្នាំ បានដឹកនាំក្រុម Sevilla ឈ្នះជើងឯក Europa League ចំនួន៣ដងជាប់ៗគ្នាផងដែរ។

លោក Nasser Al-Khelaifi ប្រធានក្លិប Paris Saint-Germain បានថ្លែងថា “ពេល នេះយើងកំពុងតែចង់បើកទំព័រប្រវត្តិសាស្រ្ត ថ្មីដល់ក្លិបហេតុដូចនេះសូមអរគុណដល់លោក Laurent Blancចំពោះសមិទ្ធផលដែលគាត់សម្រេចបានក្នុងរយៈពេល៣ឆ្នាំនេះ។ ខ្ញុំសូមជូនពរគាត់ឲ្យជោគជ័យនៅក្នុងថ្ងៃ អនាគត”។

គួររំលឹកថា លោក Laurent Blanc ក៏ ធ្លាប់ធ្វើជាគ្រូបង្វឹករបស់ក្រុមជម្រើសជាតិបារាំងផងដែរ ប៉ុន្តែគាត់បានចុះចេញពី តំណែងវិញក្រោយចាញ់អេស្ប៉ាញនៅយូរ៉ូឆ្នាំ២០១២វគ្គ៨ក្រុមចុងក្រោយ។ គាត់ធ្លាប់ ជាកីឡាកររបស់ក្លិប Barcelona, Inter Milan និង Manchester United ៕

ដោយ៖ ដេវីត