ភ្នំពេញ៖ ស្ត្រីម្នាក់ដែលគេស្គាលថា មានសតិមិនគ្រប់ បានដើរមកអង្គុយលើផ្លូវដែក ហើយត្រូវរថភ្លើងបើកមកគៀរបណ្តាលអោយរងរបួសបាក់ជើងម្ខាង កាលពីវេលាម៉ោង៥និង៣០នាទីល្ងាច ថ្ងៃទី២៨ខែមិថុនា ឆ្នាំ២០១៦ នៅភូមិសាមគ្គី១ សង្កាត់ត្រពាំងក្រសាំង ខណ្ឌពោធិ៍សែនជ័យ ។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ គេឃើញស្រ្តីរងគ្រោះដើរតាមផ្លូវបេតុងពីត្បូងទៅជើង ខណៈមកដល់ចំណុចកើតហេតុ ក៏បានមកអង្គុយលើផ្លូវដែក ស្របពេលនោះ មានរថភ្លើង មួយខ្សែរត់ពីលិចទៅកើត បើកមកជិតដល់ រថភ្លើងស៊ីផ្លេ ហើយស៊ីផ្លេទៀត ពលរដ្ខអ្នកដំណើរត្រូវឆ្លងកាត់ ផ្លូវដែក បានឈប់ស្ងៀមគ្រប់គ្នា យ៉ាងប្រុងប្រយ័ត្ន ដោយមិននឹកស្មានថា ជនរងគ្រោះ ពេលដែលរថភ្លើងកាន់តែមកកៀកហើយ បែរជាទៅអង្គុយលើផ្លូវដែក ធ្វើឲ្យអ្នកឃើញហេតុការណ៍ ស្រែកភ្លាត់មាត់គ្រប់គ្នា តែមិនហ៊ានចូលទៅចាប់ ដោយសាររថភ្លើងមកដល់ទៅហើយ បណ្តាលឲ្យកៀរជនរងគ្រោះធ្លាក់ចេញពីផ្លូវដែក រងរបួសបាក់ជើងខាងស្តាំ បែកក្បាលហូរឈាមកក្លាក្ស ។ ចំណែករថភ្លើងមិនបានឈប់ឡើយ បន្តដំណើរឆ្ពោះទៅមុខ ចូលក្រុងភ្នំពេញបាត់ បន្សល់ទុកតែស្រ្តីរងគ្រោះ ត្រូវបានរថយន្តសង្រ្គោះ របស់មណ្ឌលសុខភាពក្បែរនោះ ដឹកបញ្ជូនទៅ មន្ទីរពេទ្យព្រះកុសុមៈ ។
ជនរងគ្រោះត្រូវបានប្រជាពលរដ្ឋធ្លាប់ស្គាល់មុខ ស្រ្តីខាងលើ បានឲ្យដឹងថា គាត់មានសតិមិនប្រក្រតី មានទីលំនៅ ភូមិសាមគ្គី៥ សង្កាត់ត្រពាំងក្រសាំង ខណ្ឌពោធិ៍សែនជ័យ ៕
ដោយ៖ សុខាសែនជ័យ
