ខេត្តតាកែវ៖ បុរសជាប្តីស្រវឹងស្រាជោគជាំម្នាក់បានវាយប្រពន្ធខ្លួនឯងរហូតដល់ស្លាប់បាត់បង់ជីវិតភ្លាមៗនៅក្នុងផ្ទះរបស់ខ្លួន ព្រោះតែខឹងសុំលុយទិញស្រាផឹកបន្ថែមមិនបាន។

ករណីហិង្សាបង្កឡើងដោយប្តីប្រមឹកនេះបានកើតឡើងកាលពីវេលាម៉ោងប្រហែលជា១០យប់ថ្ងៃទី២៨ ខែមិថុនា ឆ្នាំ២០១៦ ស្ថិតនៅភូមិព្រែកតាម៉ៅ ឃុំគីរីចុងកោះ ស្រុកគីរីវង់ ខេត្តតាកែវ។

បើតាមសម្តីលោកអធិការនគរបាលស្រុកគីរីវង់បានប្រាប់ឲ្យដឹងថា ជនសង្ស័យក្នុងករណីហិង្សាដាក់ប្រពន្ធរហូតដល់ស្លាប់បាត់បង់ជីវិតនេះមានឈ្មោះ វេត សាក់ អាយុ៣៦ឆ្នាំ បានផឹកស្រាសស្រវឹងជោគនិយាយគ្នាលែងស្តាប់បាន ហើយដោយចង់ផឹកស្រាបន្តទៀតបានសុំលុយប្រពន្ធខ្លួនទិញថែម តែប្រពន្ធមិនឲ្យក៏កើតទៅជាអំពើហិង្សាវាយដំតែម្តងទៅ។ ចំណែកស្ត្រីជាប្រពន្ធឈ្មោះ ប៉ុស ស្តើង អាយុ៣៤ឆ្នាំ ទាំង២នាក់គ្រួសារនេះរស់នៅភូមិឃុំកើតហេតុខាងលើ។

ក្រោយពេលកើតហេតុកម្លាំងនគរបាលរដ្ឋបាលឃុំគីរីចុងកោះបានចុះទៅដល់កន្លែងកើតហេតុនិងបានឃាត់ខ្លួនបុរសជាប្តីបញ្ជូនមកអធិការដ្ឋាននគរបាលស្រុកគិរីវង់ចាត់ការបន្តតាមនីតិវិធី៕

ដោយ៖ ជីសូរិកា