ក្លិបបាល់ទាត់ AC Milan នៅក្នុង ក្របខ័ណ្ឌអុីតាលី Serie A បានប្រកាស តែងតាំងលោក Vincenzo Montella ជាគ្រូ បង្វឹកថ្មីហើយដោយមានកិច្ចសន្យាដឹកនាំ រយៈពេល២ឆ្នាំ ។

សេចក្តីថ្លែងការណ៍មួយរបស់ក្លិប AC Milan បានឲ្យដឹងថា “Vincenzo Montella គឺជាគ្រូបង្វឹកថ្មីរបស់ពួកយើង។ គាត់បាន ចុះកិច្ចសន្យាដែលមានសុពលភាពពីថ្ងៃទី១ ខែកក្កដា ឆ្នាំ២០១៦តទៅ។ យើងក៏សូម ថ្លែងអំណរគុណដល់លោក Cristiano Brocchi ចំពោះកិច្ចខិតខំប្រឹងប្រែងរបស់គាត់ដឹកនាំក្លិប AC Milan ក្នុងមួយរយៈ ពេលខ្លីមក”។

គួររំលឹកថា ក្លិប AC Milan បាន បណ្តេញគ្រូបង្វឹក Sinisa Mihajlovic ចេញពីតំណែងកាលពីខែមេសាហើយ លោក Cristiano Brocchi បានក្លាយទៅ ជាគ្រូបង្វឹកបណ្តោះអាសន្ន ។ ក្រុមបញ្ចប់ រដូវកាលឆ្នាំ២០១៥-២០១៦ ត្រឹមលំដាប់ ថ្នាក់លេខ៧ និងរងជើងឯកអីុតាលី Cup ដោយប្រកួតចាញ់ក្រុមសេះបង្កង់ Juventus នៅវគ្គផ្តាច់ព្រ័ត្រ ។

ចំណែកលោក Vincenzo Montella វិញដឹកនាំក្រុម Sampdoria ឈរចំណាត់ថ្នាក់លេខ១៥ក្នុងរដូវកាលចាស់។ គាត់ធ្លាប់ដឹកនាំក្រុមនៅអុីតាលីដទៃទៀតដែរដូចជា Catania និង Fiorentina ។ គាត់ធ្លាប់ជា កីឡាកររបស់ក្លិបRoma និង Sampdoria៕

ដោយ៖ ដេវីត