ភ្នំពេញ៖ ជនសង្ស័យ៣នាក់ (ស្រីម្នាក់) ដែលជាមុខសញ្ញាគាស់បន្ទប់ជួលប្រជាពលរដ្ឋនិងជាប់ពាក់ព័ន្ធនិងប្រើប្រាស់គ្រឿងញៀនត្រូវបានកម្លាំងអធិការដ្ឋាននគរបាលខណ្ឌពោធិ៍សែនជ័យរួមសហការណ៍ជាមួយកម្លាំងប៉ុស្តិ៍រដ្ឋបាលកាកាប តាមបង្ក្រាបចាប់បានជាបន្តបន្ទាប់ ក្រោយពីធ្វើសកម្មភាពគាស់សោរបន្ទប់ជួល ។

ការឃាត់ខ្លួនជនសង្ស័យទាំង៣នាក់ខាងលើនេះធ្វើឡើងកាលពីវេលាម៉ោង៤ទៀបភ្លឺថ្ងៃទី២៩ ខែមិថុនា ឆ្នាំ២០១៦ ស្ថិតនៅ ក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ  ហើយបន្តតាមចាប់បក្ខពួកបន្ថែមទៀតដែលសង្ងំលាក់ខ្លួននៅក្នុងផ្ទះជួល ភូមិព្រៃទា សង្កាត់ចោមចៅ  ។  ដោយឡែកបក្ខពួកម្នាក់ទៀតក៏ជិះម៉ូតូដែលខ្លួនលួចបានគេចខ្លួនបាត់តែម្ដង។

ប្រភពពីសមត្ថកិច្ចឲ្យដឹងថា ជនសង្ស័យទី១-ឈ្មោះ អុិន ចាន់តារា ភេទប្រុស អាយុ២២ឆ្នាំ មុខរបរមិនពិតប្រាកដ មានទីលំនៅ ភូមិក្បាលដំរី សង្កាត់កាកាប ត្រូវបានសមត្ថកិច្ចឃាត់ខ្លួនបាន ។ ចំណែកបក្ខពួលម្នាក់ទៀត មិនស្គាល់ឈ្មោះបានរត់គេចខ្លួន។

ប្រភពបានឲ្យដឹងថា មុនកើតហេតុកាលពីវេលាម៉ោង៤ទៀបភ្លឺថ្ងៃទី២៩ ខែមិថុនា ឆ្នាំ២០១៦ ជនសង្ស័យ២នាក់ទៅធ្វើសកម្មភាពគាស់បន្ទប់ជួលនៅ ភូមិក្បាលដំរី លួចបានម៉ូតូមួយគ្រឿង ម៉ាកហុងដា សេ១២៥ សេរី២០១២ ពណ៌ខ្មៅ ពាក់ស្លាកលេខ ភ្នំពេញ 1BN-3909 មានម្ចាស់ឈ្មោះ ជឿន រិច ភេទប្រុស អាយុ២៩ឆ្នាំ ស្នាក់នៅផ្ទះកើតហេតុ  ។

ក្រោយពីជនល្មើសធ្វើសកម្មភាពបានសម្រេច ហើយជនរងគ្រោះក៏ទៅប្តឹងសមត្ថកិច្ចឲ្យជួយធ្វើការស្រាវជ្រាវរហូតដល់វេលាម៉ោង៩និង៣០នាទីព្រឹកទើបចាប់ឃាត់ខ្លួនបានម្នាក់បន្ តាមចាប់បក្ខពួកបានជាបន្តបន្ទាប់ទៀត ។

ក្រោយពីឃាត់ខ្លួនបានម្នាក់នាំទៅសាកសួរនៅប៉ុស្តិ៍កាកាប នៅចំពោះ​មុខសមត្ថកិច្ចជនសង្ស័យបានសារភាពថា រួបគេមានបក្ខពួក២នាក់ទៀត ទើបបន្តតាមចាប់បានជាបន្តបន្ទាប់កាលពីវេលាម៉ោង១២និង៣០នាទីរសៀលថ្ងៃដដែល នៅផ្ទះជួលជាន់ទី៣ ខាងក្រោយផ្សារព្រៃទា សង្កាត់ចោមចៅ ។ ជនសង្ស័យជាបក្ខពួកចាប់បានទី១-ឈ្មោះ ហុក កែវ ហៅឆោម ភេទប្រុស អាយុ២៥ឆ្នាំ មុខរបរមិនពិតប្រាកដ មានស្រុកកំណើត ភូមិត្រពាំងខ្នា ឃុំជម្រះពេន ស្រុកសំរោង ខេត្តតាកែវ និងទី២-ឈ្មោះ សេង រ៉ាជា ភេទស្រី អាយុ២០ឆ្នាំ មុខរបរបម្រើនៅហាងខារ៉ាអូខេ ឥន្រ្តីខ្មៅ២ ត្រូវជាសង្សាររបស់ជនសង្ស័យខាងលើមានស្រុកកំណើតភូមិកណ្តាល ឃុំដូង ស្រុកបាទី ខេត្តតាកែវ ។

ក្រោយឃាត់ខ្លួនជនសង្ស័យសរុប៣នាក់ ស្រី១នាក់ ហើយសមត្ថកិច្ចឆែកឆេរក្នុងបន្ទប់ជួលរកឃើញឧបករណ៍សម្រាប់ជក់គ្រឿងញៀន សម្ភារៈកាច់កម៉ូតូ និងសម្ភារៈសម្រាប់ប្រព្រឹត្តល្មើសមួយចំនួនទៀត ។

បច្ចុប្បន្នជនសង្ស័យរួមទាំងសម្ភារៈសម្រាប់ប្រើក្នុងបទល្មើសត្រូវបានសមត្ថកិច្ចឃាត់ខ្លួនសាកសួរនៅអធិការដ្ឋាននគរបាលខណ្ឌពោធិ៍សែនជ័យដើម្បីកសាងសំណុំរឿងចាត់ការទៅតាមនីតិវិធី ៕

ដោយ៖ សុខាសែនជ័យ