ខេត្តពោធិ៍សាត់៖ លោកវរសេនីយ៍ទោ សុខ មេសា អធិការរង នៃអធិការដ្ឋាននគរបាលក្រុងពោធិ៍សាត់ បានឱ្យដឹងនៅព្រឹកថ្ងៃទី២៩ ខែសីហា ឆ្នាំ២០២៣នេះថា៖ មានករណីជាងសំណង់ចំនួន០២នាក់ កំពុងសាងសង់ផ្ទះជូនម្ចាស់ទីតាំង ស្រាប់តែត្រូវជញ្ជាំងដែលបានរៀបរួចហើយបាក់រលំសង្កត់ពីលើ បណ្តាលឲ្យរងរបួសធ្ងន់តែម្តង ព្រោះតែការធ្វេសប្រហែសរបស់ពួកគាត់។
បុរសជាជាងសំណង់ទាំងពីរនាក់ ទី១ឈ្មោះ លី សុខនេន ភេទប្រុស អាយុ៤៩ឆ្នាំ មុខរបរកម្មករ រងរបួសធ្ងន់ ទី២ឈ្មោះ វង់ ថុល ភេទប្រុស អាយុ៣៤ឆ្នាំ មុខរបរកម្មករ រងរបួសធ្ងន់ អ្នកទាំងពីរមានទីលំនៅក្នុងភូមិដងរុង ឃុំកោះជុំ ស្រុកកណ្តៀង ខេត្តពោធិ៍សាត់។
បើតាមប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុបុរសពីរនាក់ ដែលជាជាងសំណង់ បានមកធ្វើការសាងសង់ផ្ទះឱ្យម្ចាស់ទីតាំង កាលពីម្សិលមិញនេះ នៅចំណុចភូមិពាលញែក២ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ លុះនៅរសៀលថ្ងៃដដែលនេះពេលកំពុងសាងសង់បុរសជាជាងម្នាក់ បានផ្អែកនឹងជញ្ជាំងដែលបានរៀបរួច ខណៈនោះ ជញ្ជាំងនោះ ស្រាប់តែបាក់រលំសង្កត់ជាងសំណង់ទាំងពីរនាក់ បណ្តាលឱ្យរងរបួសធ្ងន់ ។
ក្រោយកេីតហេតុជនរងគ្រោះ ត្រូវបានសមត្ថកិច្ចមូលដ្ឋានដឹកបញ្ជូនទៅសង្គ្រោះភ្លាមៗ បច្ចុប្បន្ននៅព្រឹកថ្ងៃទី២៩ សីហានេះកំពុងសម្រាកព្យាបាលនៅមន្ទីរពេទ្យបង្អែកខេត្តពោធិ៍សាត់៕
ដោយ៖អរុណរះ
