ភ្នំពេញ៖ យុវជនម្នាក់និងអ្នករួមដំណើរពីរនាក់ទៀតបើករថយន្តមួយគ្រឿងក្នុងល្បឿនលឿនបានវ៉ារថយន្តមួយគ្រឿងផុត មិនប្រយ័ត្នជ្រុលចង្កូតទៅបុកនិងរថយន្តមួយគ្រឿងទៀតដែលបើកដោយបុរសជាជនជាតិចិននិងនាក់រួមដំណើរម្នាក់ជាជនជាតិខ្មែរដោយបញ្ច្រាស់ទិសគ្នាបណ្ដាលឲ្យរងការខូចខាតខាងមុខផ្នែកខាងឆ្វេង តែមិនបង្កររបួសដល់មនុស្សឡើយ។

ហេតុការណ៍នេះកើតឡើងកាលពីវេលាម៉ោង9និង30នាទីយប់ថ្ងៃទី29 ខែកក្កដា ឆ្នាំ2015 នៅចំនុចមុខផ្ទះល្វែងហាយលែន ស៉ីធី តាមបណ្ដោយផ្លូវ371 ស្ថិតក្នុងសង្កាត់បឹងទំពុន ខណ្ឌមានជ័យ។

តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តNISSAN មួយគ្រឿងពណ៌ខ្មៅ ពាក់ស្លាកលេខភ្នំពេញ2T.2828 បើកបរទិសដៅពីលិចទៅកើតក្នុងល្បឿនល្មម ភ្លាមនេះស្រាប់តែមានរថយន្តកូរ៉េ ពណ៌ខៀវ ពាក់ស្លាកលេខភ្នំពេញ3C.1334មួយគ្រឿងបានបើកបរទិសដៅពីកើតទៅលិច(បញ្ច្រាស់ទិសគ្នា)ក្នុងល្បឿនលឿនហើយបានវ៉ានិងរថយន្តមួយគ្រឿងទៀតមិនចាំម៉ាកនិងស្លាកលេខស្របទិសគ្នា ពេលវ៉ាផុតទាញចង្កូតមិនទាន់ជ្រុលទៅបុកនិងរថយន្តNISSAN ដែលបើកបញ្ច្រាស់ទិសគ្នានេះបណ្ដាលឲ្យរងការខូចខាតខាងមុខផ្នែកឆ្វេងយ៉ាងដំណំ តែមិនបង្ករគ្រោះថ្នាក់ដល់មនុស្សឡើយ។

ក្រោយពេលកើតហេតុភាគីទាំងសងខាងបាធ្វើការសម្របសម្រួលគ្នា ដោយភាគីខាងរថយន្តកូរ៉េសងថ្លៃខូចខាតទៅលើរថយន្តNISSANចំនួន500$ដើម្បីបញ្ចប់រឿងនៅនិងកន្លែងកើតហេតុដោយមិនរំខានដល់សមត្ថកិច្ចឡើយ៕