ខេត្តសៀមរាប ៖ ដោយមានប្រភពទឹកហូរចូលមកពីស្ទឹងជីក្រែងនៅប៉ែកខាងលើមកប៉ែកខាងក្រោមទន្លេសាប ប្រព័ន្ធធារាសាស្រ្តម្កាក់ ដែលបានកសាងតាំងពីឆ្នាំ១៩៧៣ ស្ថិតនៅភូមិម្កាក់ ឃុំគោកធ្លកលើ ស្រុកជីក្រែង ខេត្តសៀមរាប មានលទ្ធភាពស្រោចស្រពលើផ្ទៃដីស្រូវរដូវវស្សាបានចំនួន ២៥ ០០០ហិកតា ស្រូវប្រាំងបានចំនួន ៨០០០ហិកតា និងដំណាំរួមផ្សំចំនួន ១០០០ហិកតា ក្នុងនោះកសិករដែលទទួលផលពីប្រព័ន្ធធារាសាស្ត្រនេះមានចំនួន ២០ ០៦១ គ្រួសារ។ ដោយឡែក កាលនៅថ្ងៃសុក្រ ១៤រោច ខែភទ្របទ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៣ ខែតុលា ឆ្នាំ២០២៣ លោក ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម រួមជាមួយសហការី ជាតិ និងអន្តរជាតិ បានអញ្ជើញចុះត្រួតពិនិត្យវឌ្ឍនភាពនៃការដ្ឋានធ្វើទំនើបកម្មវិស្វកម្មប្រព័ន្ធធារាសាស្រ្តព្រែកពោធិ ក្នុងស្រុកស្រីសន្ធរ ខេត្តកំពង់ចាម។
លោករដ្ឋលេខាធិការបានបញ្ជាក់ថា គិតមកដល់ពេលនេះវឌ្ឍនភាពនៃការដ្ឋាន សម្រេចបានលើសពីផែនការការងារដែលបានគ្រោងទុក។ គម្រោងនេះនឹងពង្រីកការស្រោចស្រពដល់ស្រុកខ្សាច់កណ្តាល ខេត្តកណ្តាល និងផ្នែកខ្លះនៃស្រុកពារាំង ខេត្តព្រៃវែង។ ប្រព័ន្ធធារាសាស្រ្តនេះមានស្ថានីយបូមទឹកដែលបំពាក់ដោយបច្ចេកវិទ្យាទំនើបខ្នាតធំអូសទឹកពីទន្លេមេគង្គដែលមានសក្តានុពលជាអតិបរមា ដើម្បីផ្គត់ផ្គង់ ទឹកលើគ្រប់វិស័យទាំងរដូវប្រាំង និងទាំងរដូវវស្សា។
សូមជម្រាបថា ការធ្វើទំនើបកម្មលើប្រព័ន្ធធារាសាស្រ្តព្រែកពោធិគឺក្នុងគោលបំណង ដើម្បីទប់ទល់ទៅនឹងបម្រែបម្រួលអាកាសធាតុ និងការឡើងកម្ដៅនៃភពផែនដី។ ក្រសួងធនធានទឹក និងឧតុនិយមបានសហការយ៉ាងល្អជាមួយក្រសួងសេដ្ឋកិច្ច និងហិរញ្ញវត្ថុ ក្រោមហិរញ្ញប្បទានពីធនាគារអភិវឌ្ឍន៍អាស៊ី(ADB) និងធនាគារវិនិយោគអីរ៉ុប(EIB) វិនិយោគលើគម្រោងសាងសង់ប្រព័ន្ធធារាសាស្រ្តព្រែកពោធិនេះ។ ក្រសួងក៏នឹងធ្វើការរៀបចំសហគមន៍កសិករប្រើប្រាស់ទឹក(សកបទ) ស្របតាមច្បាប់ស្តីពីភាពជាដៃគូរវាងរដ្ឋ និងឯកជន (PPP) និងគោលនយោបាយស្តីពីការអភិវឌ្ឍយន្តការភាពជាដៃគូរវាងរដ្ឋ និងឯកជន ដែលរៀបចំដោយក្រសួងសេដ្ឋកិច្ច និងហិរញ្ញវត្ថុ ដើម្បីដំណើរការប្រកបដោយនិរន្តរភាពលើប្រព័ន្ធធារាសាស្រ្តនេះផងដែរ៕
ដោយ ៖ សហការី
