ភ្នំពេញ៖ កម្លាំងអន្តរាគមន៍ខណ្ឌពោធិ៍សែនជ័យ ល្បាតឃាត់បានជនសង្ស័យ២នាក់ រួមនឹងកាបូបស្ពាយរបស់មនុស្សស្រីរងគ្រោះ និងលុយមួយចំនួនយកមកសួរនាំនៅប៉ុស្តិកាកាប។

ហេតុការណ៍នេះកើតឡើងកាលពីវេលាម៉ោង១០ និង៣០នាទីយប់ថ្ងៃទី ៥ ខែកក្កដា ឆ្នាំ២០១៦ នៅចំណុចដីឡូត៍ចោលមួយកន្លែង នៅក្បែរការ៉ាស់សូគីម៊ិច ភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ ។

ជនសង្ស័យដែលឃាត់ខ្លួនបានទីមួយមានឈ្មោះ គឹម សុខហេង អាយុ២៤ឆ្នាំមុខរបរមិនពិតប្រាកដស្នាក់នៅ សង្កាត់ទឹកថ្លា ខណ្ឌសែនសុខ មានស្រុកកំណើតស្រុក កោះសុទិន ខេត្តកំពង់ចាម និងទី២មានឈ្មោះ រ៉ុប សុភា អាយុ២៣ឆ្នាំមុខរបរមិនពិតប្រាកដ ស្នាក់នៅសង្កាត់ក្រាំងធ្នង់ មានស្រុកកំណើតនៅស្រុកសន្ទុក ខេត្តកំពង់ធំ ដោយឡែកម៉ូតូដែលពួកគេជិះធ្វើសកម្មភាពម៉ាក MSX ពណ៌លឿង-ខ្មៅ អត់ស្លាកលេខ។

ក្រោយពេលកើតហេតុជនសង្ស័យរួមនិងវត្ថុតាង ត្រូវបានកម្លាំងបញ្ជូនទៅប៉ុស្តិ៍នគរបាលកាកាប ដើម្បីធ្វើការសាកសួរនាំតាមនីតិវិធីច្បាប់ ។ ដូចនេះសូមសំពាវនាវដល់ម្ចាស់កាបូបដែលមានអត្តសញ្ញាណប័ណ្ណឈ្មោះដូចខាងលើមកសាកសួរនៅប៉ុស្តិ៍នគរបាលកាកាបដើម្បីដឹងពីដំណើររឿង ៕

ដោយ៖ សុខាសែនជ័យ