ភ្នំពេញ៖ រថយន្ដកូរ៉ូឡាមួយគ្រឿងបើកក្នុងល្បឿនលឿនដល់ចំណុចផ្លូវបំបែកជាបួនមិនប្រយ័ត្នជ្រុលទៅបុករថយន្ដកាមរីហាយប្រ៊ីតចំពីចំហៀង បណ្ដាលឲ្យរងការខូចខាតទាំងសងខាង តែសំណាងល្អមិនធ្វើឲ្យមានអ្នករបួស។

ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង១រំលងអាធ្រាត្រឈានចូលថ្ងៃទី៦ ខែកក្ដដា ឆ្នាំ២០១៦ នៅចំណុចផ្លូវលេខ៣១០ កែងនឹងផ្លូវលេខ១៩៩ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន។

ប្រភពព័ត៌មានកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្ដម៉ាកកូរ៉ូឡា ពណ៌ស្ករ ពាក់ស្លាកលេខ ភ្នំពេញ2G-3249 បើកបរដោយបុរសម្នាក់ ធ្វើដំណើរតាមបណ្ដោយផ្លូវលេខ៣១០ ទិសដៅពីកើតទៅលិចក្នុងល្បឿនលឿន ពេលមកដល់ចំណុចផ្លូវបំបែកជាបួនក៏ជ្រុលទៅបុករថយន្ដមួយគ្រឿងទៀត ម៉ាកកាមរីហាយប្រ៊ីត ពណ៌ទឹកប្រាក់ ពាក់ស្លាកលេខ ភ្នំពេញ2S-7456 ដែលធ្វើដំណើរតាមបណ្ដោយផ្លូវលេខ១៩៩ ទិសដៅពីត្បូងទៅជើងចំចំហៀងរថយន្ដផ្នែកខាងស្ដាំវិលមួយជុំរងការខូចខាតទាំងសងខាង តែមិនបណ្ដាលឲ្យមានអ្នករងរបួសនោះទេ។

ក្រោយពីកើតហេតុភាគីទាំងសងខាងបានធ្វើការសម្របសម្រួលគ្នា ដោយភាគីខាងរថយន្ដកូរ៉ូឡាព្រមសងថ្លៃការខូចខាតទៅឲ្យម្ចាស់រថយន្ដកាមរីហាយប៊្រីតដើម្បីបញ្ចប់រឿងនៅកន្លែងកើតហេតុ៕

ដោយ៖ ជីម ភារ៉ា ដង្កោ