ភ្នំពេញ៖ កម្មករសំណង់ម្នាក់បានបាត់បង់ជីវិត ខណៈបញ្ជូនទៅដល់មន្ទីរពេទ្យកាល់ម៉ែត រីឯ២នាក់ផ្សេងទៀត​កំពុងស្ថិតក្រោមការជួយសង្គ្រោះបន្ទាន់ពីក្រុមគ្រូពេទ្យជំនាញ បន្ទាប់ពីកម្មករទាំង៣នាក់នេះ​ចុះស្តារអាងទឹកមួយកន្លែងក្នុងខុនដូដែលកំពុងសាងសង់ ។

ករណីនេះបានភ្ញាក់ផ្អើលឡើងកាលពីវេលាម៉ោង១០និង៣០នាទីព្រឹក ថ្ងៃទី៦ ខែកក្កដា ឆ្នាំ២០១៦ ស្ថិតនៅចំណុចផ្លូវលេខ១១១កែងផ្លូវ២៤២ សង្កាត់បឹងព្រលិត ខណ្ឌ៧មករា រាជធានីភ្នំពេញ ។

សេចក្តីរាយការណ៍បានបញ្ជាក់ថា ជនរងគ្រោះ ឈ្មោះ សំរិត សំមន អាយុ៥០ឆ្នាំ កម្មករសំណង់ខុនដូ ។ ចំណែក២នាក់ដែលកំពុងសង្គ្រោះបន្ទាន់ គេនៅមិនទាន់ស្គាល់អត្តសញ្ញាណនៅឡើយទេ ។

ប្រភពព័ត៌មេការសំណង់ខុនដូដែលកំពុងសាងសង់នោះបញ្ជាក់ថា មុនពេលកើតហេតុ កម្មករទាំង៣នាក់​បានចុះស្តារអាង ហើយមិនដឹងយ៉ាងម៉េច ស្រាប់តែមានអាការដួលសន្លប់តែម្តង ។

បច្ចុប្បន្ន មេការសំណង់ខុនដូ ខាងលើ កំពុងត្រូវបានសួរនាំដោយសមត្ថកិច្ចខណ្ឌ៧មករា ៕

ដោយ៖ ស រស្មី