នៅក្នុងរយៈពេលតែ៣ថ្ងៃទៀតប៉ុណ្ណោះ​ពិធីបុណ្យរ៉ាម៉ាដាន បានបញ្ចប់ទៅសម្រាប់អ្នកកាន់សាសនាអ៊ិស្លាមក៏មានហេតុការវាយប្រហារគ្រាប់បែកកើតឡើងនៅភាគខាងត្បូងប្រទេសថៃសម្លាប់មនុស្សយ៉ាងតិច​៥នាក់។

ស្ថានភាពអសន្តិសុខនៅភាគខាងត្បូងប្រទេសថៃកើតឡើងនៅថ្ងៃទី​០៥ ខែកក្កដា ​នៅពេលដែលភេរវករបានបើកការវាយប្រហារទៅលើទីតាំងប៉ូលិសនៅខេត្តប៉ាតានី សម្លាប់មនុស្ស​ម្នាក់និង​៣នាក់រងរបួស។

តាមប្រភពព័ត៌មាននៅក្នុងតំបន់ គ្រាប់បែកបានលាក់នៅក្នុងរយន្តដឹកប្រេងចតនៅមុខស្នាក់ការប៉ូលិស​ហើយក៏បានផ្ទុះឡើង បង្ករឲ្យមានការខូចខាតជាច្រើន។ នេះជាការវាយប្រហារលើកទី​៣ហើយក្នុងរយៈពេល​១សប្តាហ៍នៅក្នុងប្រទេសថៃ។

កន្លងមកនៅថ្ងៃទី០​៤ ខែកក្កដា មន្ត្រីប៉ូលិសនិងពលរដ្ឋម្នាក់បានស្លាប់នៅក្នុងការវាយប្រហារគ្រាប់បែកជិតព្រះវិហារអ៊ិស្លាម​នៅខេត្តប៉ាតានី។ ក្នុងថ្ងៃជាមួយគ្នានោះដែរក៏មានមុស្សម្នាក់ស្លាប់និងច្រើននាក់រងរបួស​នៅពេលដែលខ្មាន់កាំភ្លើងមិនស្គាល់អត្តសញ្ញាណបានបាញ់គ្រាប់បែក M79 ចូលទៅកាន់ស្នាក់ការប៉ូលិសនៅខេត្តយ៉ាឡា។

តាមតួលេខរបស់ប៉ូលិសថៃបានឲ្យដឹងថា ​នៅក្នុងពិធីបុណ្យហូបបួសរ៉ាម៉ាដាន របស់សាសនឹកអ៊ិស្លាមមានការវាយប្រហារសរុប​១៦លើក ហើយការវាយប្រហារទាំងនោះសំដៅទៅលើប៉ូលិស និងក្រុមសន្តិសុខ។

គ្រាន់តែក្នុងរយៈពេល​៣ថ្ងៃចុងខែរ៉ាម៉ាដាន មានប៉ូលិស​និងពលរដ្ឋ​៥នាក់ស្លាប់ និងរាប់សិបនាក់ផ្សេងទៀតរងរបួសនៅភាគខាងត្បូងប្រទេសថៃ៕

ប្រែសម្រួល៖ សាធី