ភ្នំពេញ ៖ បុរសម្នាក់ពីរនាក់បានរងរបួសធ្ងន់ធ្ងរ ហេីយត្រូវបានរថយន្តសាមុយដឹកបញ្ចូនសង្គ្រោះទៅកាន់មន្ទីរពេទ្យភ្លាមៗ បន្ទាប់ពីត្រូវបានរថយន្តម៉ាក លុចសុីសNX200tមួយគ្រឿងបេីកបុកម៉ូតូMSXពេញទំហឹងផ្លោងទៅបុកម៉ូតូធូដេ នៅត្រង់ចំណុចគល់ស្ពានហង្សកោះពេជ្រ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុ មានបុរសម្នាក់បានជិះម៉ូតូម៉ាកហុងដា ធូដេ ពណ៌ក្រហម ពាក់ផ្លាកលេខភ្នំពេញ 1IG-5315 យកមកចតនៅចញ្ចេីមផ្លូវត្រង់គល់ស្ពានហង្សដេីម្បីអង្គុយលេង បន្ទាប់មកក៏មានបុរសម្នាក់ទៀតជិះម៉ូតូម៉ាក MSX ពណ៌ខ្មៅលាយស ពាក់ផ្លាកលេខ ភ្នំពេញ DG-9004 បានធ្វេីដំណេីរចេញពីកោះពេជ្រ ដោយឆ្លងស្ពានហង្ស ខណៈឆ្លងមកដល់គល់ស្ពាន ស្រាប់តែមានរថយន្តម៉ាក លុចសុីសNX200t ពណ៌សមួយគ្រឿង ពាក់ផ្លាកលេខ កម្ពុជា C-NITA99 បេីកបរដោយបុរសម្នាក់ធ្វេីដំណេីរតាមបណ្ដោយផ្លូវបេតុង ទិសដៅពីត្បូងមកជេីងក្នុងល្បឿនលឿន និងមិនប្រយ័ត្នបានបុកម៉ូតូMSXចំពីចហៀងពេញទំហឹងបណ្ដាលឱ្យផ្លោងទៅប៉ះម៉ូតូធូដេ ដែលចតនៅចញ្ចេីមផ្លូវទាំងម្ចាស់ បណ្ដាលឱ្យភាគីម៉ូតូទាំងពីរ រងរបួសធ្ងន់ចំនួន០២នាក់ ហេីយត្រូវបានរថយន្តសាមុយដឹកបញ្ចូនទៅមន្ទីរពេទ្យសង្គ្រោះអាយុជីវិត ។
ក្រោយកេីតហេតុភ្លាមៗ រថយន្តបង្កបានព្យាយាមបេីករត់រហូតទៅដល់មុខក្រសួងបរិស្ថាន ក៏ត្រូវបានប្រជាពលរដ្ឋដេញតាមឃាត់ជាប់ និងរាយការណ៍ទៅអាជ្ញាធរមានសមត្ថកិច្ចចុះមកពិនិត្យដល់កន្លែង ។ បន្ទាប់មកសមត្ថកិច្ចមូលដ្ឋានបានចុះមកដល់ ដោយមានភាគីរងគ្រោះមកសម្របសម្រួលផងនោះ ទេីបភាគីបង្កសុំសងថ្លៃខូចខាត និងព្យាបាលរបួសទាំងពីរនាក់សរុប8200$ ដេីម្បីបញ្ចប់រឿងនៅនឹងកន្លែង ៕ ដោយ ៖ ភារ៉ា ដង្កោ
