ភ្នំពេញ៖ រថយន្តកូរ៉េចំណុះមួយតោនកន្លះមួយគ្រឿង បើកគេចពីម៉ូតូដែលព្យាយាមជែងខាងស្តាំ ជ្រុលទៅបុកឃឿនផ្លូវបណ្តាលឲ្យក្រឡាប់ផ្ងាជើង សំណាងមិនបង្កគ្រោះថ្នាក់ដល់អាយុជីវិត។

ហេតុការណ៍នេះកាលពីវេលាម៉ោង១០ និង២០នាទីយប់ថ្ងៃទី ៨ ខែកក្កដា ឆ្នាំ២០១៦ នៅចំណុចមុខរោងចក្រ៦ជាន់ តាមបណ្តោយផ្លូវវេងស្រេង ស្ថិតភូមិត្រពាំថ្លឹង សង្កាត់ចោមចៅ ខណ្ឌពោធិ៍សែនជ័យ ។

តាមប្រភពពីកន្លែងកើតហេតុ គេឃើញរថយន្តកូរ៉េ១តោនកន្លះដឹកអីវ៉ាន់ពាក់ស្លាកលេខ ភ្នំពេញ ២T-៤៧៤០ បើកតាមបណ្តោយផ្លូវវេងស្រេង ទិសដៅពីលិចទៅកើត លុះខណៈមកដល់ចំណុចកើតហេតុក៏មានម៉ូតូមួយគ្រឿងមិនចាំម៉ាក ជិះមកវ៉ាខាងស្តាំដៃ រួចបានចូលមកខាងមុខរថយន្ត ជាហេតុធ្វើអោយអ្នកបើកបររថយន្ត ទាញចង្កូតមកឆ្វេងដៃព្រោះខ្លាចបុកម៉ូតូ ទើបទៅបុកឃឿនថ្មទ្រូងផ្លូវ បណ្តាលឲ្យក្រឡាប់ផ្ងាជើងចាក់ចោលអីវ៉ាន់ពេញផ្លូវ សំណាងល្អមិនមានមនុស្សគ្រោះថ្នាក់ដល់ជីវិត ។

ក្រោយពេលកើតហេតុ សមត្ថកិច្ចមូលដ្ឋានចុះទៅដល់កន្លែងកើតហេតុនពិនិត្យ ដោយមិនមានគ្រោះថ្នាក់ដល់អ្នកដ៏ទៃ និងមិនមានខូចខាតទ្រព្យសម្បត្តិសាធារណៈ ទើបសមត្ថកិច្ចឲ្យម្ចាស់រថយន្តហៅរថយន្តមកស្ទួចលើកអីវ៉ាន់ដោយខ្លួនឯង៕

ដោយ៖ សុខាសែនជ័យ