ភ្នំពេញ ៖ បុរសជនជាតិបរទេសម្នាក់បើរថយន្តក្នុងល្បឿនយ៉ាងលឿនចុះពីស្ពានកោះនរា មិនប្រយ័ត្នស្រាប់តែរេចង្កូតទៅបុករះដើមឈើ និងបង្គោលភ្លើងបណ្តាលឲ្យបាក់មួយដើមរាបដល់ដី ចំណែករថយន្តខ្ទេចមួយកំណាត់មុខ។

ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលម៉ោង ៣និង១៥នាទីទៀបភ្លឺឈានចូល ថ្ងៃទី១៦ ខែធ្នូ ឆ្នាំ២០២៣ចំណុចក្នុងបរិវេណម្តុំស្ពានកោះនរា ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។

ប្រភពព័ត៌មានពីបុរសជាសន្តិសុខម្នាក់ នៅកន្លែងកើតហេតុ បានឲ្យដឹងថា មុនពេលកើតហេតុ ដោយរូបគាត់បានឃើញ បុរសជនបរទេសម្នាក់ បានបើករថយន្តស៊េរីទំនើបម៉ាក BMW ពណ៌សមួយគ្រឿង ពាក់ស្លាកលេខភ្នំពេញ 2BP-0037 បើកចុះពីលើស្ពានកោះនរា ក្នុងទិសដៅពីលិចទៅកើត បោះពួយយ៉ាងលឿន ខណបើកមកដល់ចំណុចកើតហេតុ ស្រាប់តែរថយន្តរេចង្កូតទៅខាងឆ្វេង ដៃបុករះសួនច្បារ និងដើមឈើមួយចំនួន ហើយរថយន្តនៅមិនទាន់អស់ល្បឿន បានបន្តទៅបុកបង្គោលភ្លើងបាក់មួយដើមទៀត ទើបរថយន្តទៅមុខលែងរួច សំណាងល្អដែលមិនបង្កឲ្យមានគ្រោះថ្នាក់ដល់មនុស្ស ចំណែកអ្នកបើរថយន្តបង្កត្រូវបានសន្តិសុខប្រចាំការ នៅស្ពានកោះនរាឃាត់ខ្លួនបាន ទុកប្រគល់ជូនខាងជំនាញ។

បន្ទាប់ពីកើតហេតុសមត្ថកិច្ចមូលដ្ឋាន សហការជាមួយសមត្ថកិច្ចជំនាញចរាចរណ៍ បានចុះមកដល់ពិនិត្យជុំវិញទីតាំងកើតហេតុរួចធ្វើកំណត់ហេតុស្ទូចយករថយន្តបង្ក ទៅដោយសារទុកនៅអធិការដ្ឋាននគរបាលខណ្ឌច្បារអំពៅ រង់ចាំឲ្យភាគីម្ចាស់រថយន្តដោះស្រាយ នៅពេលក្រោយ៕

ដោយ៖ជ្រោយពេជ្រ