ភ្នំពេញ ៖ ប្តីប្រពន្ធ២នាក់បើករថយន្តចេញពីហូបការបងប្អូន រួចបើករថយន្តត្រឡប់មកដល់ផ្ទះវិញ ខណៈប្តីចូលក្នុងផ្ទះហើយប្រពន្ធមកអង្គុយលេង នៅមុខផ្ទះអ្នកជិតខាងមួយភ្លេត ដោយភ្លេចដកសោរ ត្រូវបានបុរសជាជនសង្ស័យម្នាក់ ចូលទៅក្នុងរថយន្តបើករត់គេចខ្លួន ទៅបាត់ តែត្រូវសមត្ថកិច្ចតាមឃាត់បានវិញ ទាំងជនសង្ស័យនិងរថយន្តនៅខណ្ឌជ្រោយចង្វា។

ហេតុការណ៍បង្កឲ្យមានការភ្ញាក់ផ្អើល កាលពីម៉ោង ជាង៨យប់ថ្ងៃទី១៥ ខែធ្នូឆ្នាំ២០២៣ ចំណុចក្បែផ្សារសុភមង្គលបុរីសន្តិភាពពីរ ក្នុងភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ។
សមត្ថកិច្ចបានឲ្យដឹងថា ជនរងគ្រោះប្តីឈ្មោះ ហុង សុវណ្ណ: អាយុ ៤៥ឆ្នាំ មុខរបរ បុគ្គលិកលក់ថ្នាំពេទ្យ រស់នៅផ្ទះកើត ហេតុ និងប្រពន្ធឈ្មោះ ខុក វួចហេង អាយុ៤២ឆ្នាំ មុខរបរនៅផ្ទះ។
ប្រភពព័ត៌មានពីស្រ្តីជាប្រពន្ធ បានឲ្យដឹងថានៅមុនពេលកើតហេតុរូបគាត់និងប្តី បានបើករថយន្តម៉ាកកាមរីឆ្លាម ពណ៌ទឹកមាសមួយគ្រឿងពាក់ស្លាកភ្នំពេញ 2E-8029 បើកចេញពីហូបការបងប្អូននៅក្នុងបុរីធូលនផ្លូវជាតិលេខ៣ ក្នុងសង្កាត់ចោមចៅ២ ខណ្ឌពោធិ៍សែនជ័យ ក្រោយពីញុំាការរួចក៏បានបើករថយន្តត្រឡប់មកផ្ទះវិញ ខណៈបើកមកដល់ខាងមុខផ្ទះ ក៏បានឈប់រថយន្ត ហើយបុរសជាប្តីបានដើរចូលទៅក្នុងផ្ទះ ចំណែកស្រ្តីជាប្រពន្ធវិញ បានមកអង្គុយលេងនៅខាងមុខផ្ទះអ្នកជិតខាង ទាំងដែលមិនបានដកសោរចេញពីក្នុងរថយន្ត ពេលនោះដែរស្រាប់តែមានបុរសជាជនសង្ស័យ
ម្នាក់ មិនស្គាល់អត្តសញ្ញាណបានដើរមកពីក្រៅ រួចក៏រត់ចូលទៅក្នុងរថយន្តបើកចេញពីកន្លែងកើតហេតុ តែម្តង ភ្លាមនោះដែរ ស្រ្តីជាប្រពន្ធក៏បានរត់ទៅតោងរថយន្ត និងស្រែកឆោរឡោឲ្យអ្នកភូមិជួយតែដោយជនសង្ស័យ បន្តល្បឿនបើកគេចខ្លួនបាត់រហូតទៅដល់ខណ្ឌជ្រោយចង្វា ត្រូវបានកម្លាំងសមត្ថកិច្ចជំនាញប្រដេញ តាមឃាត់បានទាំងជនសង្ស័យ និងរថយន្តកាមរីឆ្លាមបានមកវិញ។

បន្ទាប់ពីកើតហេតុភ្លាមៗ បុរសជាជនរងគ្រោះ ក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់ចោមចៅទី ចំណែកជនសង្ស័យនឹងរថយន្តត្រូវបានសមត្ថកិច្ចនាំមកសង្កាត់ចោមចៅទី២ ខណ្ឌពោធិ៍សែនជ័យ ដែលជាកន្លែងកើតហេតុ រួចធ្វើលិខិតប្រគល់ឲ្យម្ចាស់វិញ ចំណែកជនសង្ស័យ
សមត្ថកិច្ចកំពុងសួរនាំដើម្បីចាត់ការបន្តតាមនីតិវិធី៕

ដោយ៖ជ្រោយពេជ្រ