ភ្នំពេញ៖ បុរសម្នាក់ត្រូវក្រុមក្មេងស្ទាវមានគ្នា២នាក់ ដេញវាយខណះជិះម៉ូតូម្នាក់ឯងដោយភ័យពេកក៏ជ្រុលទៅបុកបាក់បង្គោលព្រំដី ហោះចូលប្រឡាយទឹកស្អុយក៏បណ្តាលអោយរងរបួសធ្ងន់ធ្ងរ។

ហេតុការណ៍នេះ បង្ករអោយមានការភ្ញាក់ផ្អើលកាលពីវេលាម៉ោង ៩យប់ថ្ងៃទី ១៤ ខែកក្តដា ឆ្នាំ២០១៦នៅតាមផ្លូវបេតុងឋិតក្នុងភូមិចាក់ជ្រូក សង្កាត់សំរោងក្រោម ខណ្ឌពោធិសែនជ័យ ។

តាមសម្តីប្រជាពលរដ្ឋនៅកន្លែងកើតហេតុ បានអោយដឹងថា នៅមុនពេលកើតហេតុ គេឃើញជនរងគ្រោះជិះម៉ូតូម៉ាក អាយខុនមួយគ្រឿងពណ៍លឿងលាយខ្មៅ ពាក់ស្លាកលេខ 1AH -8533 ទិសដៅពីត្បូងទៅជើង ហើយមានជន២នាក់ជិះម៉ូតូមួយគ្រឿងមិនចាំម៉ាក ដេញតាមមកពីក្រោយប្រដាប់ដោយដំបង ដោយសារតែជនរងគ្រោះមានតែម្នាក់ឯង ខ្លាចជិះម៉ូតូលឿនមិនប្រយ័ត្ន ជ្រុលទៅបង្គោលព្រំដី បណ្តាលអោយបាក់ ហើយម៉ូតូនិងមនុស្សហោះចូលប្រឡាយទឹកស្អុយ ភ្លាមនោះក៏ មានអ្នកភូមិឃើញហេតុការណ៍ចុះទៅស្រង់ជនរងគ្រោះចេញពីទឹកស្អុយមកដាក់លើគោក ស្ថិតក្នុងស្ថានភាពធ្ងន់ធ្ងរ។

ក្រោយពេលកើតហេតុ បុរសរងគ្រោះត្រូវបានរថយន្តសង្គ្រោះ ដឹកទៅព្យាបាលនៅមន្ទីរពេទ្យព្រះកុសុមះ ចំណែកម៉ូតូសមត្ថកិច្ចលើកយកទៅរក្សាទុកនៅប៉ុស្តិនគរបាលសំរោងក្រោម ដើម្បីរងចាំសាច់ញាតិមកទទួលយកទៅវិញ ៕

ដោយ៖ សុខាសែនជ័យ