ភ្នំពេញ ៖ នារីម្នាក់បានបើករថយន្តយ៉ាងលឿនមិនប្រយ័ត្នរេចង្កូតទៅបុកក្បាលនាគពុះចែកទ្រូងផ្លូវ បណ្តាលឲ្យរថយន្តបង្កក្រឡាប់ជាច្រើនជុំ បណ្តាលឲ្យអ្នកបើកបររងរបួសត្រូវបានបញ្ជូនទៅមន្ទីរពេទ្យភ្លាមៗ។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីម៉ោង១០នឹង៣០នាទីយប់ថ្ងៃទី២៩ ខែកុម្ភៈ ឆ្នាំ២០២៤ នៅលើផ្លូវបេតុងកោះនរា ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាKIAពណ៌សមួយគ្រឿង ពាក់ផ្លាកលេខភ្នំពេញ 2BN-5679 បើកបរដោយនារីម្នាក់ធ្វើដំណើរតាមបណ្ដោយផ្លូវបេតុង ក្នុងទិសដៅពីកើតមកលិចក្នុងល្បឿនយ៉ាងលឿន ខណៈបើកមកដល់ចំនុចកើត ហេតុមិនបានប្រយ័ត្ន បានរេចង្កូតទៅខាងឆ្វេងដៃបុកក្បាលនាគពុះចែកទ្រូងផ្លូវ ចំពាក់កណ្ដាលពេញទំហឹងបណ្តាលឲ្យបាក់មួយកង់ ចំណែករថយន្តបង្កបានក្រឡាប់ជាច្រើនជុំទៅកល់ជាប់ក្បែរដើមឈើមួយដើមរងការខូចខាតធ្ងន់ធ្ងរបណ្តាលឲ្យនារីជាអ្នកបើករថយន្តរងរបួស ត្រូវបានដឹកតាមរថយន្តមួយគ្រឿងទៀត យកទៅសង្រ្គោះភ្លាមៗផងដែរ។

បន្ទាប់ពីកើតហេតុសមត្ថកិច្ចមូលដ្ឋានសហការជាមួយនឹងសមត្ថកិច្ចជំនាញ ចុះមកធ្វើកំណត់ហេតុរួចស្ទួចយករថយន្តបង្កទៅរក្សាទុក រង់ចាំឲ្យភាគីម្ចាស់រថយយន្តចូលខ្លួនមកដោះស្រាយគ្នានៅពេលក្រោយ៕ជ្រោយពេជ្រ