សារព័ត៌មាន AFP នៅថ្ងៃចន្ទ ទី១១ ខែមីនា ឆ្នាំ ២០២៤ បានផ្សាយថា មន្រ្តីមួយរូប បាននិយាយនៅថ្ងៃចន្ទនេះថា ចំនួនអ្នកស្លាប់ដោយសារតែគ្រោះទឹកជំនន់ និងបំណាក់ដីនៅកោះស៊ូម៉ាត្រា របស់ឥណ្ឌូណេស៉ី បានកើនឡើងដល់ ២៦នាក់ ខណៈដែល ១១នាក់ទៀតបាត់ខ្លួននៅឡើយ។

អ្នកនាំពាក្យនៃទីភ្នាក់ងារកាត់បន្ថយគ្រោះមហន្តរាយជាតិ លោក Abdul Muhari បានឱ្យដឹងក្នុងសេចក្តីថ្លែងការណ៍ថា «មនុស្សចំនួន ១១នាក់បានបាត់ខ្លួន ខណៈដែលសាកសពត្រូវបានរកឃើញចំនួន ២៦នាក់»។ លោក Fajar Sukma មន្ត្រីម្នាក់មកពីទីភ្នាក់ងារកាត់បន្ថយគ្រោះមហន្តរាយ នៃភាគខាងលិចកោះស៊ូម៉ាត្រា បានឱ្យដឹងថា ស្រុក Padang Pariaman រងការបំផ្លិចបំផ្លាញខ្លាំង ហើយកិច្ចប្រឹងប្រែងជួយសង្រ្គោះកំពុងរារាំង ដោយកត្តាអាកាសធាតុមិនអំណោយផល និងភាពរអាក់រអួលនៃចរន្តអគ្គិសនី។
ព្យុះភ្លៀងកាលពីថ្ងៃព្រហស្បតិ៍សប្តាហ៍មុន បានបង្កការបំផ្លិចបំផ្លាញនៅឯភាគខាងលិចកោះស៊ូម៉ាត្រា ដោយទឹកទន្លេឡើងជន់លិច និងបំណាក់ដីហូរច្រោះផ្ទះយកទៅ៕

រូប​ថត​: TTXVN