ភ្នំពេញ ៖ ក្នុងឱកាសអញ្ជើញត្រួតពិនិត្យវឌ្ឍនភាពនៃការសាងសង់អាកាសយានដ្ឋានអន្តរជាតិតេជោ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល នៅព្រឹកថ្ងៃទី១២ ខែមីនា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា ៖ កម្ពុជា មិនដែលមានព្រលានយន្តហោះខ្នាតអន្តរជាតិលេខ១បែបនេះទេ ហើយយើងក៏មិនខ្លាចក្នុងការអួតនោះឡើយព្រោះជាសមិទ្ធផលដែលកើតនៅលើទឹកដីកម្ពុជារបស់យើង។

សម្តេចធិបតី ហ៊ុន ម៉ាណែត បានគូសបញ្ជាក់ថា ៖ សមិទ្ធផលព្រលានយន្តហោះនេះ គឺជាការពិត មិនមែនជាការអួតខ្យល់នោះទេ ហើយទៅថ្ងៃអនាគតសមិទ្ធផលព្រលានយន្តហោះនេះ នឹងផ្តល់ផលប្រយោជន៍ដល់ប្រជាពលរដ្ឋនៅខេត្តតាកែវ និងខេត្តកណ្តាលនិយាយដោយឡែក និងសម្រាប់ប្រជាពលរដ្ឋខ្មែរនិយាយជារួម។ 

នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត មានប្រសាសន៍ថា ៖ គម្រោងអភិវឌ្ឍសាងសង់អាកាសយានដ្ឋានអន្តរជាតិតេជោ លំដាប់ថ្នាក់4F ត្រូវបានបែងចែកជា ៣ដំណាក់កាល។ ដំណាក់កាលទី១ អាកាសយានដ្ឋានអន្តរជាតិនេះ អាចទទួលអ្នកដំណើរបានប្រមាណ ១៣លាននាក់ក្នុងមួយឆ្នាំ, ដំណាក់កាលទី២ អាចទទួលបានអ្នកដំណើរ ៣០លាននាក់ក្នុង១ឆ្នាំ និងដំណាក់កាលទី៣ អាចទទួលបានអ្នកដំណើររហូតដល់៥០លាននាក់ក្នុងមួយឆ្នាំ៕

ដោយ ៖ សិលា