ខេត្តព្រះសីហនុ៖ លោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ បានឱ្យដឹងនៅថ្ងៃទី២៣ ខែមីនា ឆ្នាំ២០២៤នេះថា៖ កម្លាំងជំនាញ នៃការិយាល័យប្រឆាំងគ្រឿងញៀន មន្ទីរស្រាវជ្រាវ និងបង្រ្កាបបទល្មើសកងរាជអាវុធហត្ថខេត្តព្រះសីហនុ បានបង្ហាញមុខជនសង្ស័យប្រុសស្រីចំនួន៥៨នាក់ ជាសាធារណៈ រួមនឹងវត្ថុតាងមួយចំនួនពាក់ព័ន្ធនឹងករណីជួញដូរ និងប្រើប្រាស់គ្រឿងញៀន មុននិងបញ្ជូនខ្លួនទៅសាលាដំបូងខេត្ត ដើម្បីចាត់ការបន្តតាមនីតិវិធីច្បាប់។
លោកឧត្តមសេនីយ៍ត្រី ហេង ប៊ុនទី បានបន្តថា ក្នុងប្រតិបត្តិការនោះ ដោយអនុវត្តតាមបទបញ្ជាយ៉ាងម៉ឹងម៉ាត់ កម្លាំងជំនាញ នៃការិយាល័យប្រឆាំងគ្រឿងញៀន កាលពីវេលាម៉ោង១៤ និង២០នាទីរសៀលថ្ងៃទី២២ ខែមីនាម្សិលមិញនេះ បានកសាងសំណុំរឿងបញ្ជូនជនសង្ស័យប្រុសស្រី ចំនួន ៥៨នាក់ (ស្រី០៤នាក់) រួមនឹងវត្ថុតាងមួយចំនួនពាក់ព័ន្ធនឹងករណីជួញដូរ និងប្រើប្រាស់ដោយខុសច្បាប់នូវសារធាតុញៀន ទៅអយ្យការអមសាលាដំបូងខេត្តព្រះសីហនុ ដែលចុះបង្រ្កាបបាននៅចំណុចក្រុមទី០៥ ភូមិ៣ សង្កាត់លេខ២ ក្រុងព្រះសីហនុ។
ដោយឡែកកម្លាំងកងរាជអាវុធហត្ថខេត្ត បានចាប់ដកហូតយកវត្ថុតាងរួមមាន៖ ម្សៅក្រាមពណ៌សថ្លា ចំនួន ០៧កញ្ចប់ ទម្ងន់ស្មើនឹង ៥៦.១៤ក្រាមទាំងសំបក, ដបជក់ ០៤, ខ្សែជក់ ១៥, បារីអេឡិចត្រូនិច ០៣ដើម, ដែកកេះ ០៤, ដំបងឆក់ ០១, ទូរសព្ទដៃ ៣៥គ្រឿង, ម៉ូតូ ១០គ្រឿង និងថង់វេចខ្ចប់មួយចំនួន។
បច្ចុប្បន្នជនសង័្សយ និងវត្ថុតាង កំពុងឃាត់ខ្លួនបណ្ដោះអាសន្ន និងកសាងសុំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់។
សូមជម្រាបជូនថា កម្លាំងកងរាជអាវុធហត្ថខេត្ដព្រះសីហនុ រួមនឹងតាមបណ្តាមូលដ្ឋានកងរាជអាវុធហត្ថក្រុង ស្រុក និងស្នាក់ការសន្តិសុខ ចេញប្រតិបត្តិការល្បាតចល័ត ឈរជើងតាមគោលដៅក្នុងភូមិសាស្រ្ត និងសហការជួយសម្រួលចរាចរណ៍លើដងផ្លូវ ដើម្បីការពារសន្តិសុខ សុវត្ថិភាព រក្សាសណ្តាប់ធ្នាប់ ជូនដល់ភ្ញៀវទេសចរជាតិ-អន្តរជាតិ និងបងប្អូនប្រជាពលរដ្ឋក្នុងមូលដ្ឋានជាប្រចាំផងដែរ៕ដោយ៖តារា
