ភ្នំពេញ៖ បុរសម្នាក់បានខ្ចីម៉ូតូប្អូនស្រីជិះទៅផឹកសុីក្នុងហាងមួយកន្លែងពេលចេញមកវិញស្រាប់តែមានអ្នកច្រឡំជិះម៉ូតូដែលខ្លួនខ្ចីប្អូននោះយកទៅបាត់បន្សល់ទុកម៉ូតូ១គ្រឿងដែលមានម៉ាកដូចគ្នានៅមុខហាងផឹកសុីនោះហើយក៏មានការភ្ញាក់ផ្អើលដល់សមត្ថកិច្ចចុះមកពិនិត្យ។

ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១២ និង៣០នាទីរំលងអាធ្រាត្រឈានចូលថ្ងៃទី២២ ខែកក្កដា ឆ្នាំ ២០១៦នៅចំណុចភោជនីយដ្ឋានវិចិត្រ៥ នៅតាមបណ្ដោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។

ប្រភពព័ត៌មានពីបុរសជាម្ចាស់ម៉ូូតូដែលគេច្រឡំយកទៅនោះបានឲ្យដឹងថា មុនពេលកើតហេតុរូបគាត់បានខ្ចីម៉ូតូរបស់ប្អូនស្រី
ម៉ាកហុងដាវេវ ពណ៌ខ្មៅ មិនចាំស្លាកលេខ ដោយរូបគាត់បានខ្ចីជិះទៅមើលការប្រគួតបាល់ទាត់ពេលការប្រគួតចប់រូបគេបានចេញមកវិញហើយក៏ចូលទៅក្នុងភោជនីយដ្ឋានខាងលើដើម្បីផឹកសុី ក្រោយពីផឹករួចក៏ដើរចេញមកវិញពេលមកដល់កន្លែងផ្ញើម៉ូតូនៅពីមុខហាងស្រាប់តែមិនឃើញម៉ូូតូរបស់ខ្លួនក៏សួរអ្នកកិបសំបុត្រម៉ូតូថាបងម៉ូតូខ្ញុំបាត់ទៅណាហើយ? ពេលនោះអ្នកកិបសំបុត្របានប្រាប់ថាគេយកទៅអស់ហើយសល់តែ១គ្រឿងនឹងទេ។ ក្រោយមកទើបបុរសនោះដឹងថា មានអ្នកយកម៉ូតូច្រឡំហើយក៏រាយការណ៍ប្រាប់សមត្ថកិច្ចឲ្យចុះមកជួយពិនិត្យ។

ប្រភពដដែលបានបន្តទៀតថា ម៉ូតូដែលគេជិះច្រឡំយកទៅនោះម៉ាហុងដាវេវ ពណ៌ខ្មៅ ពុំចាំស្លាកលេខ ព្រោះខ្ចីប្អូនស្រី ចំណែកម៉ូតូដែលបន្សល់ទុកនោះម៉ាកហុងដាវេវដូចគ្នា ពណ៌ខ្មៅ ពាក់ស្លាកលេខ ភ្នំពេញ 1BZ-8726 សង្ស័យជារបស់អ្នកដែលជិះច្រឡំយកម៉ូតូគេទៅ។ចំណែកបុរសម្នាក់ដែលចាំកិបសំបុត្រម៉ូតូនៅមុខហាងវិញបាននិយាយថា ដោយសារតែម៉ូតូមានម៉ាកដូចគ្នាពណ៌ដូចគ្នាហើយអ្នកចេញច្រើនពេកហើយមកពីគាត់មិនបានពិនិត្យមើលសំបុត្រឲ្យបានត្រឹមត្រូវទើបមានរឿងដូច្នេះ។

តាមការឲ្យដឹងពីលោក ដួង វណ្ណះ នាយប៉ុស្តិ៍សង្កាត់ភ្នំពេញថ្មីបានឲ្យដឹងថា ក្រោយពីទទួលសេចក្តីរាយការណ៍ខាងភ្លាមលោកបានបញ្ជាឲ្យមន្ត្រីរបស់លោកចុះទៅពិនិត្យហើយក៏ឃើញថាមិនមានជាករណីលួចនោះទេគឺជាការច្រឡំគ្នាហើយសង្ស័យថាអ្នកដែលជិះម៉ូតូគេទៅនោះស្រវឹងខ្លាំងទើបមិនចាំម៉ូតូរបស់ខ្លួន។

ក្រោយមកលោកបានសុំគោលការណ៍ថ្នាក់លើយកម៉ូតូដែលនៅសល់(ច្រឡំនោះ)យកទៅរក្សាទុកនៅប៉ុស្តិ៍នគរបាលភ្នំពេញថ្មីសិននិងស្រាវជ្រាវរកម្ចាស់ម៉ូតូដែលច្រឡំនោះមកវិញ៕

ដោយ៖ តុង សីហា