ភ្នំពេញ៖ ដោយសារតែប្រើប្រាស់គ្រឿងញៀនបានធ្វើឲ្យបុរសម្នាក់បាត់បង់ស្មារតីរហូតដល់គ្រប់គ្រងខ្លួនឯងលែងបានក៏បែកគំនិតចង់ដុតផ្ទះជួលចោល បង្កឲ្យមានការភ្ញាក់ផ្អើលដល់ប្រជាពលរដ្ឋរស់នៅក្បែរនោះនាំគ្នារត់ចែកជើងគ្នាទាំងថ្ងៃ។

ហេតុការណ៍ភ្ញាក់ផ្អើលខាងលើនេះកើតឡើងកាលពីវេលាម៉ោង១២និង១០នាទីថ្ងៃត្រង់ថ្ងៃទី២២ ខែកក្កដា ឆ្នាំ២០១៦ ស្ថិតនៅផ្ទះលេខ២៨៤E2 បន្ទប់ជួលជាន់ទី២ ខាងលើភោជនីយដ្ឋាន តាយតាយ តាមបណ្ដោយផ្លូវព្រះមុន្នីវង្ស ក្រុម២៤ ភូមិ៦ សង្កាត់បឹងរាំង ខណ្ឌដូនពេញ ។

សមត្ថកិច្ចឲ្យដឹងថា ករណីបុរសដុតផ្ទះជួលនេះសំណាងល្អត្រូវសមត្ថកិច្ចមូលដ្ឋានចុះទៅអន្តរគមន៍ជួយពន្លត់ទាន់ពេលវេលា ហើយអ្វីដែលហួសចិត្តនោះគឺបុរសញៀនថ្នាំបានប្រាប់សមត្ថកិច្ចថា ខ្ញុំជាអ្នកដុតចឹង តើមានទោសប៉ុន្មានឆ្នាំទៅ?

សមត្ថកិច្ចបន្តថា ជនបង្កឈ្មោះ សៅ សារ៉ាត ភេទប្រុស អាយុ២៥ឆ្នាំ ជនជាតិខ្មែរ មុខរបរពីមុនចុងភៅ ស្រុកកំណើត ភូមិត្នោតជុំ ឃុំត្នោតជុំ ស្រុបារាយ ខេត្តកំពង់ធំ ស្នាក់បន្ទប់ជួលជាន់ទី២ ខាងលើភោជនីយដ្ឋានយីហោ តាយតាយ ស្នាក់នៅជាមួយមិត្តភក្ត្រ៤នាក់ទៀត ។

តាមប្រភពពីសមត្ថកិច្ចនគរបាលប៉ុស្តិ៍បឹងរាំង បានឲ្យដឹងទៀតថា នៅមុនពេលកើតហតុគឺជនបង្កបានយកចង្ក្រានហ្គាសបើកដុតចោលនិងយកខោអាវមកគរដុតពីលើទើបបណ្តាលឲ្យឆេះនិងផ្ទុះកំប៉ុងនៅក្នុងចង្ក្រានបង្កជាភ្លើងឆាបឆេះពិដានកុងផ្លាកគេ បន្ទាប់មកក៏ដើរមកអង្គុយផឹកស្រានៅមុខផ្ទះរងចាំសមត្ថកិច្ចមកចាប់ខ្លួន ព្រមទាំងនិយាយថា ខ្លួនជាអ្នកដុត តើមានទោសប៉ុន្មានឆ្នាំដែរ?

ប្រភពដដែរបានបន្តទៀតថា បន្ទាប់ពីមានផ្សែងហ៊ុយចេញពីបន្ទប់នោះគឺបង្កឲ្យភ្ញាក់ផ្អើលដល់អ្នកជិតខាងនាំគ្នាជួយចាញ់ទឹកតាមទុយោរនិងដាក់ធុងដួសជះពន្លត់ទើបរលត់ទៅវិញ ។ ចំណែកឯជនបង្កក្រោយកើតហេតុសមត្ថកិច្ចចុះទៅឃាត់ខ្លួន ហើយរូបគេបាននិយាយថា ខ្លួនមិនមានជំងឺអ្វីនោះឡើយ ហើយបើមិនជឿរឲ្យគ្រូពេទ្យមកពិនិត្យខ្លួនគេចុះ ។

បច្ចុប្បន្នជនបង្កត្រូវនាំយកមកឃុំខ្លួនបណ្តោះអាសន្ននៅប៉ុស្តិ៍នរគបាលបឹងរ៉ាំង ដើម្បីកសាងសំណុំរឿងចាត់ការតាមនីតិវិធី៕

ដោយ៖ ស ដារ៉ា